Political News : काँग्रेस पक्षाने तब्बल २०० हून अधिक नेत्यांवर निलंबनाची कारवाई केल्याची बातमी समोर आली आहे. १ नोव्हेंबर रोजी दिल्लीतील रामलीला मैदानावर आयोजित करण्यात आलेल्या ‘व्होट बचाओ, देश बचाओ’ महारॅलीला गैरहजर राहिल्याने ही कारवाई करण्यात आल्याचे वृत्त आहे. सात राज्यांतील युवक काँग्रेसच्या पदाधिकाऱ्यांचा यामध्ये समावेश असल्याचे सांगितले जात आहे. या घडामोडीमुळे राजकीय वर्तुळात चर्चा सुरू झाली आहे. (Political News)

सात राज्यांतील नेत्यांवर कारवाई?

सूत्रांच्या माहितीनुसार, निलंबित करण्यात आलेल्या नेत्यांची राज्यनिहाय संख्या पुढीलप्रमाणे आहे.

– मध्य प्रदेश : ६० नेते
– गुजरात : ४९ नेते
– झारखंड : ३२ नेते
– पश्चिम बंगाल : २६ नेते
– तेलंगणा : १४ नेते
– उत्तर प्रदेश : ११ नेते
– हरियाणा : १० नेते

या नेत्यांमध्ये राज्य युवक काँग्रेसचे उपाध्यक्ष, सरचिटणीस आणि सचिव स्तरावरील पदाधिकाऱ्यांचा समावेश असल्याचे वृत्त आहे.

महारॅलीला गैरहजर राहिल्याने कारवाई?

महारॅलीला उपस्थित न राहण्याबाबत समाधानकारक स्पष्टीकरण देण्यात संबंधित पदाधिकारी अपयशी ठरल्याने ही कारवाई करण्यात आल्याचे सांगितले जात आहे. या संदर्भात सोशल मीडिया प्लॅटफॉर्म ‘एक्स’वर पोस्ट केलेल्या निवेदनात मध्य प्रदेश युवक काँग्रेसने राष्ट्रीय नेतृत्वाच्या निर्देशानुसार कारवाई केल्याचे म्हटले आहे.

उपस्थितीवर ठेवली होती डिजिटल नजर

भारतीय युवक काँग्रेसने राष्ट्रीय, राज्य आणि जिल्हास्तरीय पदाधिकाऱ्यांना महारॅलीत सहभागी होण्याचे निर्देश दिले होते. उपस्थितीची नोंद ठेवण्यासाठी ‘विथ आयवायसी’ या अधिकृत ॲपवर नोंदणी करण्यास सांगण्यात आले होते. (Political News)

तसेच दिल्लीतील मिंटो रोडवरील संमेलनस्थळी बारकोड स्कॅनरची व्यवस्था करण्यात आली होती. या डिजिटल नोंदींच्या आधारे कोणते पदाधिकारी महारॅलीला उपस्थित नव्हते, याची माहिती मिळाल्याचे वृत्त आहे. दरम्यान, इतर राज्यांतील काही पदाधिकाऱ्यांवरही कारवाई होण्याची शक्यता सूत्रांनी व्यक्त केली आहे. (Political News)