Congress Senior leader Resigned: विधानसभा निवडणुकीच्या तोंडावर आसाम काँग्रेसला मोठा धक्का बसला आहे. पक्षाचे वरिष्ठ नेते आणि 2024 लोकसभा निवडणुकीत सिलचर मतदारसंघातून उमेदवार राहिलेले सूर्यकांत सरकार यांनी सोमवारी पक्षाच्या प्राथमिक सदस्यत्वाचा राजीनामा दिला. विशेष म्हणजे, हा राजीनामा त्याच दिवशी देण्यात आला, ज्या दिवशी अखिल भारतीय काँग्रेस कमिटीचे (AICC) अध्यक्ष मल्लिकार्जुन खरगे (Mallikarjun Kharge) कछार जिल्ह्यातील बोरखोला येथे प्रचारसभेला संबोधित करत होते. राजीनामा पत्रात सूर्यकांत सरकार यांनी पक्षाच्या राज्य नेतृत्वावर गंभीर नाराजी व्यक्त केली आहे. त्यांनी नमूद केले की, संघटनात्मक प्रश्न वारंवार मांडूनही त्याकडे दुर्लक्ष करण्यात आले. त्यांच्या प्रामाणिक प्रयत्नांनंतरही नेतृत्वाने त्यांच्या अडचणी गांभीर्याने घेतल्या नाहीत, असा आरोप त्यांनी केला. हेही वाचा – ममता बॅनर्जी की भाजप, पश्चिम बंगालमध्ये यावेळी कोण स्थापन करणार सरकार? याशिवाय, काही पदाधिकाऱ्यांमध्ये जबाबदारीची कमतरता असल्याचेही त्यांनी पत्रात नमूद केले. आपण अनुसूचित जातीच्या पार्श्वभूमीचे असल्यामुळे आपल्या मुद्द्यांकडे दुर्लक्ष होत असल्याची भावना त्यांनी व्यक्त केली. बराक खोऱ्यातील पक्षाच्या कामकाजावर टीका करताना, संघटनात्मक नियुक्त्या आणि महत्त्वाचे निर्णय गुणवत्ता आणि कामगिरीऐवजी इतर घटकांवर आधारित घेतले जात असल्याचा आरोप त्यांनी केला. “या परिस्थितीत पक्षात राहणे कठीण झाले आहे,” असे स्पष्ट करत त्यांनी राजीनामा दिला. तसेच समर्थक आणि मतदारांचे आभार मानत, सार्वजनिक सेवेसाठी आपली बांधिलकी कायम असल्याचे त्यांनी सांगितले. दरम्यान, निवडणुकीच्या अंतिम टप्प्यात आलेल्या या राजीनाम्यामुळे काँग्रेसच्या एकजुटीवर प्रश्नचिन्ह निर्माण झाले असून, आसाममधील पक्षासाठी हा धक्का मानला जात आहे.
