India-Italy relations : काँग्रेस नेते राहुल गांधी यांनी पंतप्रधान नरेंद्र मोदी यांच्या परराष्ट्र धोरणावर टीका करताना इटलीच्या पंतप्रधान जॉर्जिया मेलोनी यांचा संदर्भ दिल्यानंतर परराष्ट्र मंत्रालयाने विदेशी नेत्यांबाबत राजकीय वक्तव्य करताना संयम आणि सन्मान राखण्याचे आवाहन केले आहे.

परराष्ट्र मंत्रालयाचे प्रवक्ते रणधीर जायसवाल यांनी भारत आणि इटलीमधील संबंध मजबूत असल्याचे सांगितले. दोन्ही देशांमधील संबंध आणखी मजबूत करण्यासाठी सातत्याने प्रयत्न सुरू असल्याचे त्यांनी स्पष्ट केले. कोणताही मुद्दा सन्मानपूर्वक मांडला पाहिजे, असेही त्यांनी सांगितले.

जायसवाल म्हणाले, भारताचे इटलीसोबत मजबूत संबंध आहेत आणि हे संबंध आणखी दृढ करण्याची भारताची इच्छा आहे. राजनैतिक परंपरेनुसार एकमेकांचा सन्मान आणि परस्पर समजूत लक्षात घेऊन द्विपक्षीय संबंध मजबूत करणे महत्त्वाचे आहे.

राहुल गांधींच्या वक्तव्यावरून वाद –

परराष्ट्र मंत्रालयाची ही प्रतिक्रिया राहुल गांधी यांनी काँग्रेसच्या राष्ट्रीय अधिवेशनात केलेल्या वक्तव्यानंतर एका दिवसाने आली. राहुल गांधी यांनी मोदींच्या परराष्ट्र धोरणावर टीका करताना ते केवळ विदेशी नेत्यांना मिठी मारण्यापुरते मर्यादित असल्याचे म्हटले.

आपली भूमिका स्पष्ट करताना राहुल गांधी यांनी मंचावर काँग्रेसचे अध्यक्ष संदीप दीक्षित यांना मिठी मारली. त्यानंतर संदीप दीक्षित यांनी राहुल गांधींना, ‘मेलोनी समजून तर पकडले नव्हते ना?’ असा सवाल केला. त्यावर राहुल गांधी यांनी, ‘मी अजून तिथपर्यंत पोहोचलो नाही,’ असे उत्तर दिले.

या संवादाचा संदर्भ इटलीच्या पंतप्रधान जॉर्जिया मेलोनी यांच्याशी होता. या टिप्पणीवर सोशल मीडियावर काही जणांनी टीका केली असून, ती महिलांविषयी अपमानास्पद असल्याचा आरोप करण्यात आला आहे.