Baramati and Rahuri By Election : राज्यातील दोन विधानसभेसच्या पोटनिवडणुका 23 एप्रिलला होणार आहे. 6 एप्रिलला उमेदवारी अर्ज दाखल करण्याचा शेवटचा दिवस आहे. बारामती विधानसभा पोटनिवडणूक सुनेत्रा पवार तर राहुरी विधानसभा पोटनिवडणूक अक्षय कर्डिले लढणार आहेत. या दोन्ही जागा बिनविरोध करण्यात येणार असल्याचा प्रयत्न सुरू असतानाच काँग्रेसने मोठा निर्णय घेत बारामती आणि राहुरी विधानसभेसाठी उमेदवार देणार असल्याचा निश्चय केला आहे. मिळालेल्या माहितीनुसार, बारामती विधानसभा पोटनिवडणुकीसाठी काल संभाव्य उमेदवारांच्या मुलाखती पार पडल्या असून, स्थानिक पातळीवरील समीकरणांचा आढावा घेण्यात आला आहे. दरम्यान, राहुरी विधानसभा पोटनिवडणुकीसाठी उमेदवार निश्चितीची प्रक्रिया अंतिम टप्प्यात असून, लवकरच अधिकृत घोषणा होण्याची शक्यता आहे. या निर्णयामुळे बारामती आणि राहुरीतील राजकीय लढती अधिक रंगतदार होण्याची चिन्हे दिसत आहेत. दोन्ही मतदारसंघात मित्रपक्षांशी चर्चा करूनच उमेदवारांच्या नावावर शिक्कामोर्तब करण्यात येणार असल्याची माहिती काँग्रेस सूत्रांकडून मिळाली आहे हर्षवर्धन सपकाळांनी दिली महत्वाची माहिती राहुरी आणि बारामती विधानसभेबाबत आमच्या पक्ष श्रेष्ठीसोबत बोलणं झालं आहे. यासाठी आमच्याकडे उमेदवारी मागणारे अर्ज आले आहेत. बारामतीसाठी 6 अर्ज आले आहेत आणि राहुरीमधे 4 अर्ज आले आहेत. येत्या 2 दिवसांत आम्ही निवडणूक लढण्याबाबत भूमिका जाहीर करू. आज ऑनलाईन मुलाखती देखील झाल्या आहेत, अशी माहिती काँग्रेस प्रदेशाध्यक्ष हर्षवर्धन सपकाळ यांनी दिली आहे. बारामती आणि राहुरी या विधानसभा मतदारसंघाच्या पोटनिवडणुकीसाठी 23 एप्रिलला मतदान होईल तर मतमोजणी 4 मे रोजी होणार आहे. भाजपचे आमदार शिवाजीराव कर्डिले यांच्या निधनाने अहिल्यानगर जिल्ह्यातील राहुरी विधानसभा मतदारसंघाची जागा रिक्त झालेली आहे. तर, दिवंगत उपमुख्यमंत्री अजित पवार यांचे विमान अपघातात निधन झाले. यामुळे बारामती विधानसभा मतदारसंघाची जागा रिक्त आहे. हेही वाचा : Top 10 News: सुनेत्रा पवार-प्रफुल्ल पटेल यांची महत्वाची बैठक, पुण्यात विक्रमी पावसाची नोंद आणि बहुप्रतीक्षित रामायणचा टिझर प्रदर्शित, वाचा अशा टॉप १० बातम्या
