Satara: विकासरत्न कै. अभयसिंहराजे भोसले प्रतिष्ठान व आंबेघर येथील श्री विठ्ठलधाम क्षेत्र यांच्या संयुक्त विद्यमाने दि. २६ डिसेंबर २०२६ ते १ जानेवारी २०२७ या कालावधीमध्ये राजधानी सातारा येथे होणारा राजधानी भक्ती महोत्सव यशस्वी होण्यासाठी आपण कटिबद्ध आहोत, अशी ग्वाही राज्याचे सार्वजनिक बांधकाम मंत्री शिवेंद्रसिंहराजे भोसले यांनी दिली.

राधिका चौकातील महोत्सव समितीच्या मध्यवर्ती संपर्क कार्यालयाचा शुभारंभ ना. शिवेंद्रसिंहराजे भोसले व श्री गुरु प्रमोद महाराज जगताप यांच्या हस्ते झाला. याप्रसंगी ना. शिवेंद्रसिंहराजे बोलत होते. प्रदीर्घ कालखंडानंतर राजधानी सातारा नगरीत होणाऱ्या या महोत्सवाला सर्वतोपरी सहकार्य करण्याचे आश्वासन ना. शिवेंद्रसिंहराजे यांनी दिले. या कार्यक्रमात महाराष्ट्रातील ख्यातनाम कीर्तनकार ज्ञानदान करणार आहेत. माउलींच्या मानाच्या अश्वांचे गोल रिंगण होणार आहे. तसेच ग्रंथराज ज्ञानेश्वरीची हत्तीवरून मिरवणूक काढण्यात येणार आहे, अशी माहिती सोहळ्याचे संयोजक प्रवीण महाराज शेलार यांनी यावेळी दिली.

श्रीपती माने आबा यांनी मान्यवरांचे स्वागत केले. मदनराव कदम यांनी प्रास्ताविक केले. यावेळी ज्ञानदेव रांजणे, जयेंद्र चव्हाण, ह. भ. प. बबनराव सापते महाराज, संजय महाराज वेळूकर, अमोल महाराज जाधव, पुरुषोत्तम कुलकर्णी, मारुती जाधव, रवींद्र लोहार, विक्रम शिंदे, सौरभ धनवडे, राहुल बाबर, मारुती निगड़ीकर, योगेश यादव, सुरेश पार्टे, राधेशाम सातारकर, कृष्णा काकडे, संभाजी शेळके यांच्यासह सातारा जिल्हातील अनेक मान्यवर कीर्तनकार, वादक, गायक व नगरसेवक तसेच गुरुकुलचे सर्व आजी माजी विद्यार्थी उपस्थित होते.