नाशिक – 50 खोके एकदम ओकेच्या घोषणा देणाऱ्या शिवसेनेच्या ठाकरे गटाच्या कार्यकर्त्यांकडे पाहून मुख्यमंत्री एकनाथ शिंदे यांनी धनुष्यबाणातून बाण सोडल्याची कृती केल्याची घटना नाशिकमध्ये घडली आहे. या घटनेचा एक व्हिडिओ सोशल मीडियात चांगलाच व्हायरल झाला आहे.

राज्यातील लोकसभा निवडणूक अंतिम टप्प्यात पोहोचली आहे. नाशिकसह 13 मतदारसंघात 20 मे रोजी पाचव्या टप्प्याचे मतदान होणार आहे. मुख्यमंत्री एकनाथ शिंदे यांनी गुरुवारी नाशिकचे महायुतीचे उमेदवार हेमंत गोडसे यांच्यासाठी रोड शो केला. यावेळी त्यांचा प्रचारथ शहरातील एका चौकात पोहोचला. तिथे ठाकरे गटाचे कार्यकर्ते उभे होते. त्यांनी एकनाथ शिंदे यांचा प्रचाररथ पाहताच 50 खोके एकदम ओकेच्या घोषणा दिल्या.

ठाकरे गटाच्या कार्यकर्त्यांची ही घोषणाबाजी पाहून मुख्यमंत्री एकनाथ शिंदे यांनाही चेव आला. त्यांनी त्यांच्याकडे पाहत भात्यातून बाण काढल्याचा अभिनय करत त्यांच्या दिशेने ताणून बाण सोडला. त्यानंतर त्यांनी आपला प्रचाररथ तसाच पुढे नेला.