मुंबई : विधिमंडळाच्या पावसाळी अधिवेशनादरम्यान मुंबईतील विधानभवनात आज लाजिरवाणी घटना घडली. भाजपचे आमदार गोपीचंद पडळकर आणि राष्ट्रवादी काँग्रेस (शरद पवार गट) चे आमदार जितेंद्र आव्हाड यांच्या समर्थकांमध्ये लॉबीत जोरदार हाणामारी झाली. एकमेकांचे कपडे फाटेपर्यंत हा राडा सुरू होता, ज्यामुळे विधानभवन परिसरात खळबळ उडाली. मागील काही दिवसांपासून आव्हाड आणि पडळकर यांच्यात शाब्दिक वाद रंगला होता. आव्हाड यांनी पडळकर यांच्यावर “मंगळसूत्र चोर” अशा घोषणा देत टीका केली होती, तर पडळकर यांनीही आव्हाड यांना शिवीगाळ केल्याचा व्हिडिओ समोर आला होता. या वादाने आज उग्र रूप धारण केले. विधानभवनाच्या लॉबीत राष्ट्रवादीचे कार्यकर्ते नितीन देशमुख आणि इतर कार्यकर्ते उपस्थित असताना पडळकर यांचे समर्थक तिथे आले. दोन्ही गटांमध्ये प्रथम बाचाबाची झाली, जी नंतर हाणामारीत बदलली. कार्यकर्त्यांनी एकमेकांवर हल्ला करत कपडे फाडण्यापर्यंत मजल मारली. घटनास्थळी उपस्थित सुरक्षा कर्मचाऱ्यांनी हस्तक्षेप करत दोन्ही गटांना शांत केले. जितेंद्र आव्हाड यांनी संतप्त प्रतिक्रिया देताना म्हटले, “पडळकर यांच्या समर्थकांनी आमच्यावर हल्ला केला. आमदार म्हणून शिवीगाळ करायची, तर अशा व्यक्तींनी आमदारपदावर राहण्याचा काय अधिकार?” या घटनेमुळे राजकीय वातावरण तापले असून, विधानभवनासारख्या प्रतिष्ठित ठिकाणी अशी मारामारी होणे राजकीय संस्कृतीला काळिमा फासणारे आहे. याबाबत पोलिसांकडून चौकशी सुरू आहे.
