महाराष्ट्र केसरीच्या जिल्हा निवड चाचणी स्पर्धेचे उद्घाटन नगर – वरिष्ठ राज्यस्तरीय गादी व माती अजिंक्यपद कुस्ती स्पर्धा (अधिवेशन) व महाराष्ट्र केसरी किताब लढत 2023 स्पर्धेसाठी केडगाव देवी येथे रविवारी (दि.22) जिल्हा निवड चाचणीचे उद्घाटन उत्साहात पार पडले. हलगीच्या निनादात लाल मातीच्या आखाड्यात व गादीवर डावपेचचा थरार रंगला होता. जिल्ह्यातील नामवंत कुस्ती मल्ल या स्पर्धेत उतरले होते. तर केडगाव ग्रामस्थांसह पंचक्रोशीतील कुस्तीप्रेमींनी कुस्ती पहाण्यासाठी मोठी गर्दी केली होती. प्रारंभी हनुमान व छत्रपती शिवाजी महाराजांच्या भव्य पुतळ्यास अभिवादन करुन आखाडा पूजनाने कुस्तीला प्रारंभ झाला. यावेळी अहमदनगर जिल्हा तालीम संघाचे अध्यक्ष पै. वैभव लांडगे, ज्येष्ठ पैलवान महादेव अण्णा कोतकर, निवड चाचणी स्पर्धेचे आयोजक पै. हर्षवर्धन कोतकर, नगरसेवक संग्राम शेळके, युवराज पठारे, अमोल येवले, संग्राम कोतकर, खजिनदार पै. नाना डोंगरे, उपाध्यक्ष दत्तात्रय अडसुरे, कार्याध्यक्ष पै. अजय अजबे, शहराध्यक्ष पै. नामदेव लंगोटे, पै. बाळू भापकर, पाथर्डी तालुकाध्यक्ष पै. पप्पू शिरसाठ, पै. ऋषीकेश कोतकर, पै. महेश लोंढे, विठ्ठल कोतकर, माजी नगरसेवक सुनिल भिंगारे, सुनिल कोतकर, बबन मतकर, अभिजीत कोतकर, बबलू कोतकर, उपमहाराष्ट्र केसरी श्रीधर मुळे, पै. वसंत पवार, पोपट भुजबळ, पोपट शिंदे, संदेश शिंदे, चंद्रकांत कावरे, सुर्यभान नांगरे, सागर गायकवाड, बबन शेळके, पै. विलास चव्हाण, पै. विष्णू खोसे, पै. संदीप डोंगरे, दिलीप झिंजुर्डे, सचिन शिरसाठ आदींसह जिल्हा तालीम संघाचे पदाधिकारी, कुस्तीपटू, प्रशिक्षक व केडगावचे ग्रामस्थ मोठ्या संख्येने उपस्थित होते. पै. लांडगे म्हणाले, महाराष्ट्राचे वैभव असलेली कुस्ती स्पर्धेला नगर जिल्ह्यात चालना देण्याचे काम जिल्हा तालीम संघ करत आहे. विविध स्पर्धेच्या माध्यमातून कुस्तीपटूंना प्रोत्साहन दिले जात आहे. पै. हर्षवर्धन कोतकर म्हणाले, केडगावला दोनदा जिल्हा निवड चाचणी स्पर्धा घेण्याचा मान मिळाला. केडगाव हा कुस्तीपटूंसाठी प्रसिध्द असून, अनेक मल्ल या मातीतून पुढे आले आहेत. मातीतल्या अस्सल खेळाला उर्जितावस्था आणण्यचे काम या स्पर्धेच्या माध्यमातून केले जात आहे. राज्य कुस्तीगीर परिषदेच्या वतीने धाराशिव (उस्मानाबाद) येथे 66 वी महाराष्ट्र केसरी कुस्ती स्पर्धा होणार आहे. या स्पर्धेसाठी नगर जिल्ह्याचा संघ पाठविण्यासाठी केडगावला दिमाखदार जिल्हा निवड चाचणी स्पर्धा घेण्यात आली. 57, 61, 65, 70, 74, 79, 86, 92, 97 व महाराष्ट्र केसरी 86 ते 125 किलो वजन गटात निवड चाचणी स्पर्धा पार पडली. स्पर्धेसाठी तीनशेपेक्षा जास्त मल्लांचा सहभाग लाभला. महाराष्ट्र केसरी गटातील माती व गादी विभागातील दोन्ही विजयी मल्लांना 2 किलो चांदीची गदा बक्षीस देण्यात येणार आहे.
