पिंपरी – चिंचवड विधानसभा पोटनिवडणुकीच्या प्रचाराला चांगलीच रंगत आली आहे. या पोटनिवडणुकीला आगामी महापालिका निवडणुकीची रंगीत तालीम समजून माजी नगरसेवक आणि इच्छुकांनी जोरदार जनसंपर्क सुरू आहे. बहुतेक माजी नगरसेवक तसेच इच्छुकांनी आपपल्या उमेदवारासाठी आपल्या परिसरातील जनसंपर्काची धुरा सांभाळली आहे.

महापालिकेसाठी इच्छुक असणाऱ्या या नेते मंडळींनी संपूर्ण परिसर पिंजून काढत आपल्या पक्षाचे चिन्ह आणि आपला चेहरा मतदारांच्या मनावर बिंबविण्याच्या दृष्टीने या पोटनिवडणुकीचा उपयोग करुन घेत असल्याचे दिसून येत आहे. अनेक माजी नगरसेवक आणि नगरसेविका स्वतः आपल्या उमेदवाराची जाहिरात पत्रके घेऊन फिरत आहेत. घरोघरी जाऊन मतदारांसोबत थेट संवाद साधत आहेत.

विधानसभा पोटनिवडणुकीच्या उमेदवारांची तसेच पक्षाची संपूर्ण यंत्रणा मदतीला असल्याने त्याचा उपयोग करुन घेतला जात आहे. त्यामुळे कमीत कमी पदरखर्चात जास्तीत जास्त जनसंपर्काचा फायदा आगामी महापालिका निवडणुकीमध्ये होण्याची शक्‍यता वर्तविली जात आहे.

पोटनिवडणुकीची लढत तिरंगी होत असून अनेक मुख्य पक्ष थेट पद्धतीने रिंगणात नाहीत, तरी देखील सर्वच पक्षांकडून या पोटनिवडणुकीसाठी जोर लावला जात आहे. सर्वच पक्षांनी आपल्या यंत्रणा कामाला लावल्या आहेत. निवडणूक लढवित असलेल्या पक्षासोबत आपल्या पक्षाचेही निवडणूक चिन्ह आणि ध्वज असावा, असा आग्रह मित्र पक्षांकडून धरण्यात येत आहे. तसेच प्रत्येक भाषणात आणि सोशल मीडियावरील पोस्टमध्ये अधिकृत उमेदवारांकडून मित्र पक्षांचा उल्लेख आर्वजून केला जात आहे. बूथ प्रमुख, पेज प्रमुख, संघटनेतील सर्व स्तरावरील पदाधिकारी कामाला लागले आहेत. याचाही फायदा घेत इच्छुकांनी निवडणुकीच्या वातावरणात आपला चेहरा सर्वसामान्यांपर्यत पोहचविण्याचा, तसेच कार्यकर्त्यांना पुन्हा सक्रिय करण्याचा सपाटा लावला आहे.

…तरच उमेदवारी
आपल्या प्रभागातून आपल्या उमेदवाराला मिळालेल्या मतांवरच आपली महापालिका निवडणुकीतील उमेदवारी निश्‍चित होणार असल्याचे बहुतेक सर्वच माजी नगरसेवक आणि इच्छुकांना कळले आहे. एका पक्षाने तर थेट तंबीच दिली आहे. जर आपल्या प्रभागातून मोठ्या प्रमाणात मते मिळाली तरच उमेदवारी देऊ. यामुळे सर्वच जण पोटनिवडणुकीला महापालिकेची रंगीत तालीम मानत कामाला लागले आहेत.