Chinchwad Police – मोबाइल आणि दागिने चोरीला गेलेल्या दु:खी नागरिकांना चिंचवड पोलिसांनी आनंद परत मिळवून दिला. चोरीच्या गुन्ह्यांचा छडा लावत मोठ्या प्रमाणात मोबाइल आणि दागिने परत मिळविले आणि मूळ मालकांना परतही केले. एकूण ५० मोबाइल, सोन्याचे दागिने व दुचाकी असा एकूण १० लाख ९० हजार ८०९ रुपयांचा मुद्देमाल संबंधित मालकांना परत करण्यात आला आहे. केंद्र शासनाच्या दूरसंचार विभागाच्या सीईआयआर पोर्टलच्या माध्यमातून हरवलेल्या मोबाईलची नोंदणी करून त्यांना ब्लॉक करण्यात आले होते. त्यानंतर संबंधित मोबाईल पुन्हा वापरात आल्यास त्याचा मागोवा घेऊन पोलीसांनी तपास केला. या तपासातून संबंधित वापरकर्त्यांची माहिती मिळवून मोबाईल जप्त करण्यात आले. या मोहिमेत एकूण ७ लाख ६० हजार रुपये किमतीचे ५० मोबाइल जप्त करण्यात आले. तसेच ३ लाख ३० हजार ८०९ रुपये किमतीचे सोन्याचे दागिने व दुचाकी असा मुद्देमालही हस्तगत करण्यात आला. हा सर्व मुद्देमाल पोलीस उपआयुक्त यांच्या हस्ते संबंधित मूळ मालकांना परत करण्यात आला. या कारवाईमुळे नागरिकांमध्ये समाधान व्यक्त होत असून पोलीसांच्या कार्यक्षमतेचे कौतुक होत आहे. ही कारवाई मा. पोलीस उपआयुक्त श्री. संदीप आटोळे यांच्या मार्गदर्शनाखाली तसेच सहाय्यक पोलीस आयुक्त श्री. विद्यात कुबडे यांच्या मार्गदर्शनाखाली पार पडली. यामध्ये वरिष्ठ पोलीस निरीक्षक श्री. दत्तात्रय चासकर, पोलीस निरीक्षक (गुन्हे) श्री. रणजित जाधव, पोलीस उपनिरीक्षक श्री. अजित दुधे, पोलीस हवालदार सचिन सोनपेटे व पोलीस शिपाई मोहन वरळे यांनी विशेष कामगिरी बजावली. .
