बीजिंग (चीन) : जगातील वाढत्या संघर्ष आणि शस्त्रास्त्र स्पर्धेत चीनने एका अत्यंत घातक हत्याराने सर्वांना हादरवले आहे. LY-1 हे उच्च-शक्तीचे लेझर हत्यार, ज्याची मारक क्षमता तब्बल २० हजार किलोमीटरपर्यंत आहे, हे चीनच्या नव्या सैन्य सामर्थ्याचे प्रतीक ठरले आहे. यामुळे चीन जवळपास संपूर्ण जगाच्या टप्प्यात आला असून, पृथ्वीवरील कोणत्याही भागात, अगदी अंतराळातील धमकींनाही प्रत्युत्तर देण्यास सक्षम झाला आहे.

बुधवारी (३ सप्टेंबर) बीजिंगमध्ये द्वितीय महायुद्धाच्या विजय दिवसानिमित्त आयोजित भव्य परेडमध्ये हे हत्यार प्रथमच प्रदर्शित करण्यात आले. पीपल्स लिबरेशन आर्मी (PLA) ने आयोजित या परेडमध्ये LY-1 लेझरचा समावेश असून, त्याने जागतिक संरक्षण क्षेत्रात खळबळ उडवली आहे.

बीजिंगमध्ये भव्य परेडमध्ये प्रदर्श

चीनच्या राजधानी बीजिंगमध्ये झालेल्या या परेडमध्ये राष्ट्रपती शी जिनपिंग यांच्या नेतृत्वाखाली सैन्याचे विविध हत्यार प्रदर्शित करण्यात आले. यात LY-1 लेझर हत्यार आठ चाकांच्या HZ-155 चिलखत ट्रकवर बसवलेले दिसले. हे हत्यार शत्रूच्या हत्यारांचे ऑप्टिकल सेंसर्स नष्ट करू शकते, ज्यामुळे ते ड्रोन, मिसाइल आणि इतर उपकरणांना प्रभावीपणे रोखू शकते.

चीनच्या सरकारी वृत्तपत्र ‘ग्लोबल टाईम्स’ने लिहिले की, हे डायरेक्टेड एनर्जी वेअपन (DEW) मुख्यतः नौदलासाठी डिझाइन केले गेले असून, ते ड्रोन आणि मिसाइल नष्ट करण्यासाठी उपयुक्त आहे. मात्र, जमिनीवरही त्याचा वापर शक्य आहे. परेडमध्ये हे हत्यार प्रथमच सार्वजनिकरित्या दाखवण्यात आले. यामुळे चीनच्या सैन्य तंत्रज्ञानातील प्रगतीचे दर्शन घडले. परेडमध्ये रशियाचे राष्ट्रपती व्लादिमीर पुतिन आणि उत्तर कोरियाचे किम जोंग उन यांसारखे नेतेही उपस्थित होते.

LY-1 ची वैशिष्ट्ये काय?

LY-1 हे लेझर हत्यार ड्रोन, सबसॉनिक अँटी-शिप मिसाइल आणि इतर धमक्यांना नष्ट करण्यासाठी बनवले गेले आहे. ते शत्रूच्या ऑप्टिकल सेंसर्सना निष्क्रिय करू शकते, ज्यामुळे शत्रूची दृष्टी आणि नियंत्रण प्रणाली अचानक बंद पडते. चीनचे संरक्षण तज्ज्ञ सांगतात की, हे हत्यार समुद्रातील युद्धात क्रांती घडवू शकते, कारण ते कमी खर्चात अचूक हल्ले करू शकते. उच्च-शक्तीच्या लेझर बीममुळे ते हायपरसॉनिक मिसाइलही रोखू शकते.

याची रेंज २० हजार किलोमीटरपर्यंत असल्याने, ते जगभरातील कोणत्याही ठिकाणी हल्ला करण्यास सक्षम आहे. अगदी पृथ्वीबाहेरील धमकींनाही प्रत्युत्तर देऊ शकते. हे हत्यार नौदलाच्या जहाजांवर बसवण्यासाठी प्राधान्याने डिझाइन केले असले तरी, जमिनीवरही तैनात करता येते. चीनने याची अनेक तांत्रिक वैशिष्ट्ये गुप्त ठेवली आहेत, पण परेडमधील दर्शनाने जागतिक शस्त्रास्त्र स्पर्धेत नवीन वळण आले आहे.