सोमाटणे – शिकण्यासाठी विद्यार्थ्यांना आनंददायी व प्रेरणादायी वातावरण मिळावे यासाठी भारतरत्न डॉ. बाबासाहेब आंबेडकर आदर्श शाळा योजनेंतर्गत “मुख्यमंत्री माझी शाळा सुंदर शाळा’ हे अभियान मावळ तालुक्यातील शाळांमध्ये प्रभावीपणे राबविण्याचे आवाहन गट शिक्षणाधिकारी सुदाम वाळूंज यांनी केले आहे.
शासनाने डॉ. बाबासाहेब आंबेडकर आदर्श शाळा योजनेंतर्गत मुख्यमंत्री माझी शाळा, सुंदर शाळा’ हे अभियान राबविण्याचे निर्देश दिले आहेत. त्यानुसार मावळ तालुक्यातील ४३५ शाळा मधील जवळपास ८१ हजार विद्यार्थी या अभियानात सहभागी होणार आहेत. तशा सूचना या सबंधित शाळांचे मुख्याध्यापक यांना एक बैठक बोलावून केल्या आहेत.
या अभियानाची प्रभावीपणे अंमलबजावणी तसेच माध्यमिक व उच्च माध्यमिक मुख्याध्यापकांची सहविचार सभा येण्यात आली होती. अभियानात सहभागी होणाऱ्या शाळांना विविध उपक्रमांचे आयोजन ४५ दिवसांत करणे आवश्यक राहील. अभियानात सहभागी होणाऱ्या शाळांना विद्यार्थी केंद्रित उपक्रमांच्या आयोजनासाठी ६० गुण व शाळा व्यवस्थापनाकडून आयोजित आरोग्य, आर्थिक साक्षरता व कौशल्य विकास, भौतिक सुविधा, तंबाखूमुक्त, प्लास्टिकमुक्त शाळा अशा उपक्रमांसाठी ४० गुण असे एकूण १०० गुण देण्यात येतील. विद्यार्थी केंद्रित उपक्रमांमध्ये शाळा व परिसराच्या सौंदर्यीकरणासाठी १० गुण, विद्यार्थ्यांच्या विविध उपक्रमातील, व्यवस्थापनातील व निर्णयप्रक्रियेतील सहभागासाठी १५ गुण, शैक्षणिक गुणवत्ता व्यक्तिमत्त्वविकासासाठी १० गुण, शाळेची इमारत व परिसर स्वच्छतेसाठी १० गुण, राष्ट्रीय एकात्मतेस प्रोत्साहन देण्यासाठीच्या उपक्रमास ५ गुण तसेच विविध क्रीडास्पर्धाच्या आयोजनासाठी १० गुण देण्यात येणार आहे.
गुणांकन देऊन प्रथम, द्वितीय व तृतीय क्रमांकाची निवड करण्यात येऊन पारितोषिके देण्यात येतील, अशी माहितीही यावेळी गटशिक्षणाधिकारी सुदाम वाळूंज यांनी दिली. या अभियानात ज्या शाळा आपला सक्रीय सहभाग दाखवुन पारितोषिक पटकावतील त्यांच्याकडे एक आदर्श शाळा म्हणून पहिले जाईल. त्यामुळे सहभागी शाळांनी हे अभियान अत्यंत प्रभावीपणे राबवावे असे आवाहनही यावेळी गटविकास अधिकारी आणि गटशिक्षणाधिकारी यांच्या वतीने करण्यात आले आहे.
कोट : हे अभियान यशस्वी करण्यासाठी जास्तीत जास्त शाळांनी आपला सहभाग नोंदवावा आणि आपल्या शाळेला सर्व गुणसंपन्न शाळा बनवण्याच्या या संधीचे सोने करावे. गटविकास अधिकारी,गटशिक्षणाधिकारी आणि प्रशासन अधिकारी यांच्या मार्गदर्शनाखाली मुख्याध्यापकांची बैठक घेतली आहे .पुन्हा परंतु पुन्हा एक बैठक केंद्रप्रमुख,मुख्याध्यापक यांच्यासाठी आयोजित केली आहे. या अभियानात शाळांनी ऑनलाईन भरलेल्या माहितीची तपासणी करून नंबर काढले जाणार आहेत.
– सुधीर भागवत गट विकास अधिकारी पंचायत समिती मावळ