Raj Thackeray Uddhav Thackeray Interview Teaser : गेल्या काही दिवसांपूर्वी शिवसेना उद्धव बाळासाहेब ठाकरे पक्ष आणि महाराष्ट्र नवनिर्माण सेना पक्ष याशिवाय शरद पवार यांच्या राष्ट्रवादी काँग्रेस पक्ष या तिन्ही पक्षाच्या वतीने मुंबई महापालिका निवडणुकीसाठी वचननामा जाहीर करण्यात आला. हा वचननामा ठाकरे बंधूंच्या हस्ते शिवसेना भवन येथून प्रसिद्ध करण्यात आला. त्यानंतर पत्रकार परिषदेत राज ठाकरे आणि उद्धव ठाकरे यांनी महायुतीवर जोरदार हल्लाबोल केला होता. ठाकरे बंधूंची एकत्रित मुलाखत घेतली जाणार असून ती प्रसिद्ध करण्यात येईल असे सांगण्यात आले होते. आता या मुलाखतीचा टीझर समोर आला असून, राज ठाकरे यांनी मुख्यमंत्री देवेंद्र फडणवीस यांच्यावर बोचरी टीका केली आहे. खासदार संजय राऊत आणि दिग्दर्शक महेश मांजरेकर यांनी ही ठाकरे बंधूंची बहुप्रतीक्षित मुलाखत घेतली आहे. या मुलाखतीत मुंबईसाठी ठाकरे बंधूंचा अजेंडा काय आहे हे जाणून घेण्यात आले आहे. याशिवाय दोघांनीही राज्यातील राजकारणापासून ते मुंबईतील विविध समस्यांबाबतही भाष्य केले आहे. तसेच या मुलाखतीत उद्धव ठाकरे आाणि राज ठाकरे यांची आक्रमक शैली दिसून आली. ही मुलाखत सामनाकडून घेण्यात आली आहे. दोन धुरंधर… महाराष्ट्राची महा मुलाखत ८ आणि ९ जानेवारी https://t.co/QBsK6Wu7Hj — Sanjay Raut (@rautsanjay61) January 7, 2026 भ्रष्टाचाराबाबत मुख्यमंत्री फडणवीस यांनी बोलूच नये असे वक्तव्य राज ठाकरे यांनी केले. दुर्देवाने आजचे राज्यकर्ते हे मुंबईकर नाहीत, असे उद्धव ठाकरे यांनी म्हटले. तर, मुंबईकरांना काय हवंय हे इथं जन्माला आल्याशिवाय कळणार नसल्याचे राज यांनी म्हटले. महेश मांजरेकर यांनी मुंबईतील वाहतूक समस्या आणि इतर प्रश्न उपस्थित केल्याचे टीझरमध्ये दिसून आले. या मुलाखतीचा टीझर उबाठा गटाचे नेते खासदार संजय राऊत यांनी त्यांच्या एक्स अकाऊंटवरून शेअर केला आहे. या व्हिडीओच्या खाली त्यांनी दोन धुरंधर… महाराष्ट्राची महामुलाखत ८ आणि ९ जानेवारी असे म्हटले आहे. यामुळे ही मुलाखत दोन भागांत प्रसिद्ध करण्यात येणार असल्याचे स्पष्ट झाले असून, या मुलाखतीत ठाकरे बंधूं काय काय बोलणार हे पाहणे महत्वाचे असणार आहे. मुंबई महापालिका निवडणुकीत ठाकरे बंधूंनी युती केली असून, निवडणुकीचे रणशिंग फुंकले आहे. प्रभागानुसार नागरिकांच्या भेटीगाठी घेतल्या जात आहे. ठाकरे बंधूमुळे मुंबई महापालिका निवडणुकीत महायुतीपुढे मोठे आव्हान निर्माण झाले आहे. या निवडणुकीत मराठी मते निर्णायक ठरणार असून ती कोणाच्या पाराड्यात पडणार हे देखील पाहणे महत्वाचे असणार आहे. हेही वाचा : शेअर बाजार पुन्हा कोसळला ! सेन्सेक्स २०० अंकांनी घसरला तर निफ्टी २६,११७ च्या खाली
