दिल्ली : छत्रपती संभाजीमहाराजांच्या आयुष्यावर आधारित असलेल्या छावा या चित्रपटाने प्रेक्षकांच्या मनात घर केले आहे. संभाजी महाराजांचा इतिहास पहिल्यांदा मोठ्या स्क्रीनवर आल्याने या चित्रपटाला पसंती मिळत आहे. त्याच अनुषंगाने हा चित्रपट आता संसद भवनात देखील दाखवला जाणार आहे. यावेळी पंतप्रधान मोदींसह देशातील खासदार उपस्थित असणार आहेत. तसेच चित्रपटातील दिग्दर्शक, कलाकार हे देखील या स्क्रीनिंगच्या वेळी संसदेत उपस्थित असणार आहेत.

दरम्यान, विकी कौशलच्या छावा चित्रपटाला प्रेक्षकांकडून खूप प्रेम मिळत आहे. प्रदर्शित झाल्यानंतर ४० दिवसांनीही हा चित्रपट बॉक्स ऑफिसवर प्रचंड कमाई करत आहे. पंतप्रधान नरेंद्र मोदी यांनीही यापूर्वी ‘छवा’ चित्रपटाचे कौतुक केले होते आणि आता ते विकी कौशलच्या या चित्रपटाच्या विशेष प्रदर्शनाला उपस्थित राहणार आहेत.

संसदेच्या ग्रंथालय इमारतीतील बालयोगी सभागृहात २७ मार्च रोजी ‘छवा’ चित्रपटाचे विशेष प्रदर्शन होणार आहे. या स्क्रिनिंगमध्ये पंतप्रधान मोदी, गृहमंत्री अमित शहा यांच्याव्यतिरिक्त अनेक भाजप मंत्री आणि खासदारही उपस्थित राहणार आहेत. तसेच संभाजीची भूमिका साकारललेला विकी कौशल, दिग्दर्शक लक्ष्मण उत्तेकर आणि निर्माते दिनेश विजन हे देखील संसदेत आयोजित ‘छवा’ चित्रपटाच्या विशेष प्रदर्शनाला उपस्थित राहणार आहेत. २१ फेब्रुवारी रोजी दिल्लीत झालेल्या अखिल भारतीय मराठी साहित्य संमेलनात पंतप्रधान मोदींनी ‘छावा’चे कौतुक केले होते. ते म्हणाले होते- ‘महाराष्ट्र आणि मुंबईने मराठी चित्रपटांसह हिंदी चित्रपटांना ही उंची दिली आहे.

‘छावा’चे बॉक्स ऑफिस कलेक्शन

१४ फेब्रुवारीला चित्रपटगृहांमध्ये प्रदर्शित झालेला लक्ष्मण उतेकर यांचा ‘छावा’ चित्रपट सध्या देशांतर्गत बॉक्स ऑफिससोबतच जगभरात धुमाकूळ घालत आहे. टॉप ५ सर्वाधिक कमाई करणाऱ्या चित्रपटांच्या यादीत समाविष्ट असलेल्या ‘छावा’ने केवळ भारतातच ५८२ कोटी रुपयांच्या जवळपास व्यवसाय केला आहे आणि जगभरातील कमाई ७७५ कोटी रुपयांच्या पुढे गेली आहे. चित्रपटाच्या स्टारकास्टबद्दल बोलायचे झाल्यास, मराठा साम्राज्याचे महान शासक छत्रपती संभाजी महाराजांची भूमिका विकी कौशलने साकारली आहे. रश्मिका मंदान्ना, अक्षय खन्ना, आशुतोष राणा आणि दिव्या दत्ता यांसारख्या अनेक कलाकारांनी महत्त्वपूर्ण भूमिका साकारल्या आहेत. दिनेश विजान यांनी चित्रपटाची निर्मिती केली आहे.