पुणे, {प्रभात वृत्तसेवा} – राज्यातील महावितरणच्या विद्युत वाहन चार्जिंग स्टेशन्सला आता सौरऊर्जा प्रकल्पांद्वारे वीजपुरवठा करण्यात येणार आहे. चार्जिंग स्टेशन्सच्या वीजपुरवठ्यासाठी त्याच परिसरात सौर प्रकल्प उभारून हरित ऊर्जेची निर्मिती करण्यात येणार आहे. विद्युत वाहनाच्या चार्जिंग स्टेशनला हरित ऊर्जेद्वारे वीजपुरवठा करणारा पहिला प्रकल्प पुण्यातील गणेशखिंड येथे साकारत आहे.

महावितरणकडून अनेक उपकेंद्र व प्रशासकीय इमारतीच्या आवारात विद्युत वाहनांसाठी चार्जिंग स्टेशन उभारण्यात आले आहेत. यात पुणे परिमंडलामध्ये शहरी व ग्रामीण भागात एकूण १८ ठिकाणी विद्युत वाहनांचे चार्जिंग स्टेशन्स कार्यान्वित झाले आहेत. या चार्जिंग स्टेशनला हरित ऊर्जेतून वीजपुरवठा करण्यासाठी आता चार्जिंग स्टेशनलगतच्या इमारतीवर किंवा खुल्या जागेवर सौरऊर्जा प्रकल्प उभारण्याचे नियोजन आहे.

या चार्जिंग स्टेशनसाठी उभारण्यात येणाऱ्या सौरऊर्जा प्रकल्पाची महावितरणचे संचालक (प्रकल्प) प्रसाद रेशमे यांनी पाहणी केली, तसेच इतर चार्जिंग स्टेशन्ससाठी सौरऊर्जा निर्मितीचे प्रस्ताव सादर करण्याचे निर्देश दिले, तसेच हा सौर प्रकल्प लवकरात लवकर पूर्ण करण्याची सूचना त्यांनी केली. या वेळी अधीक्षक अभियंता संजीव राठोड, अनिल गेडाम, अमित कुलकर्णी, उपकार्यकारी अभियंता डॉ. संतोष पाटणी यांची उपस्थिती होती.

मुख्य अभियंता राजेंद्र पवार म्‍हणाले, महावितरणने कार्यान्वित केलेल्या चार्जिंग स्टेशनला हरित ऊर्जेतून वीजपुरवठा करण्यासाठी प्रस्ताव तयार करण्याचे काम सुरू आहे. सौरऊर्जा प्रकल्पाच्या माध्यमातून १८ पैकी जास्तीत जास्त चार्जिंग स्टेशनला हरित ऊर्जेद्वारे वीजपुरवठा करण्याचा प्रयत्न आहे.