नवी दिल्ली – चारधाम यात्रा सुरू झाली असून हेली सेवेचे बुकिंगही देखील जोरात सुरू आहे. अशात सायबर ठगही सक्रिय झाले आहेत. चारधाम यात्रेच्या हेली सेवेच्या नावाखाली बनावट वेबसाईट चालवून फसवणूक केली जात आहे. उत्तराखंड पोलिसांच्या स्पेशल टास्क फोर्सने (एसटीएफ) हेली सेवेच्या नावाखाली फसवणूक करणाऱ्या पंधरा बनावट वेबसाइट्स पकडल्या आहेत. वेबसाइट तात्काळ बंद करण्यात आल्या असून ऑपरेटर्सचा शोध सुरू आहे. याआधीही एसटीएफने चारधाम यात्रेच्या हेली सेवेच्या नावाने सुरू असलेल्या 20 बनावट वेबसाइट बंद केल्या होत्या. आतापर्यंत 35 बनावट वेबसाईट पकडण्यात आल्या आहेत. एसटीएफचे वरिष्ठ पोलीस अधीक्षक आयुष अग्रवाल यांनी दिलेल्या माहितीनुसार, बनावट वेबसाइट तयार करून हेली सेवा बुक करण्याच्या नावाखाली विविध राज्यांमध्ये लाखो रुपयांची फसवणूक केली जात आहे. चारधाम यात्रेसाठी हेली सेवेचे बुकिंग करण्यासाठी अधिकृत वेबसाइटची माहिती नसल्याने भाविकांची फसवणूक होत आहे. यंदा चार धाम यात्रेसाठी हेली सेवेचे अधिकृत बुकिंग गेल्या आठ एप्रिलपासून सुरू झाले आहे. ज्यामध्ये IRCTC कडून अधिकृत वेबसाइटवरून बुकिंग केले जात आहे. या वेबसाईटची url www.heliyatra.irctc.co.in अशी आहे. याशिवाय हेली सेवा बुकिंगसाठी दुसरी कोणतीही वेबसाइट नाही. बनावट साईट आढळल्यास एटीएसला माहिती देण्याचे आवाहन अधिकाऱ्यांनी सर्वसामान्यांना केले आहे. कोणत्याही बनावट हेली सेवेची वेबसाईट, मोबाईल नंबर किंवा लिंक आढळल्यास मोबाईल नंबर 9456591505 आणि 9412080875 वर स्पेशल टास्क फोर्सला कळवा असे आवाहन करण्यात आले आहे..
