Chandrapur Politics :चंद्रपूर महानगरपालिकेच्या (Chandrapur Politics) निवडणुकीनंतर सत्ता स्थापनेच्या हालचालींना वेग आला असून, भाजपकडून काँग्रेसला सत्तेबाहेर ठेवण्यासाठी जोरदार प्रयत्न सुरू झाल्याचे स्पष्ट संकेत मिळत आहेत.

भाजप आमदार किशोर जोरगेवार आणि भाजप नेते बंटी (कीर्तीकुमार) भांगडीया यांनी मुख्यमंत्री देवेंद्र फडणवीस यांची भेट घेतल्याने राजकीय वर्तुळात तीव्र चर्चा सुरू झाली आहे. या भेटीमुळे महापालिकेत भाजपकडून सत्तास्थापनेच्या दाव्याला बळ मिळण्याची शक्यता वर्तवली जात आहे.

निकालानंतरची राजकीय स्थिती

चंद्रपूर महानगरपालिकेत (Chandrapur Politics) एकूण ६७ नगरसेवक असून, बहुमतासाठी ३४ जागांची आवश्यकता आहे. निवडणूक निकालानंतर काँग्रेस हा सर्वात मोठा पक्ष ठरला असला तरी, त्यांना एकट्याने बहुमत मिळालेले नाही.

सध्याच्या गणितानुसार भाजपकडे २४ नगरसेवक आहेत, तर शिवसेना (उद्धव बाळासाहेब ठाकरे गट) कडे ६, वंचित बहुजन आघाडीकडे २ आणि इतर अपक्ष/इतर २ नगरसेवक आहेत. भाजपकडून २४ + ६ (ठाकरे गट) + २ (वंचित) + २ (इतर) अशा फॉर्म्युल्यावर चर्चा सुरू असून, एकूण ३४ चा बहुमताचा आकडा गाठण्यासाठी प्रयत्न सुरू आहेत.

हे पण वाचा : Principal Died : झेंडावंदनाची तयारी करताना मुख्याध्यापकाचा दुर्दैवी मृत्यू; मैदानातच घेतला अखेरचा श्वास

काँग्रेसमध्ये आमदार विजय वडेट्टीवार आणि खासदार प्रतिभा धानोरकर गटातील अंतर्गत वाद अधिक तीव्र झाल्याने पक्षाची एकजूट कमकुवत झाली आहे. हा वाद भाजपसाठी सोयीचा ठरत असून, काँग्रेसला सत्तेपासून दूर ठेवण्याची रणनीती आखली जात असल्याचे बोलले जात आहे.

सत्तास्थापनेच्या हालचालींना वेग

सूत्रांच्या माहितीनुसार, ठाकरे गटाचे ६, वंचित बहुजन आघाडीचे २ आणि इतर २ असे एकूण १० नगरसेवक लवकरच मुख्यमंत्री देवेंद्र फडणवीस यांची भेट घेणार असल्याची शक्यता आहे. या भेटीमुळे चंद्रपूरच्या राजकारणात मोठा उलटफेर होण्याची चर्चा आहे. ठाकरे गट आणि वंचितचे नगरसेवक ‘किंगमेकर’च्या भूमिकेत असल्याने, त्यांच्या निर्णयावर सत्ता कोणाच्या हाती जाईल हे अवलंबून आहे. या हालचाली काँग्रेससाठी धोक्याची घंटा मानली जात आहे.

हे पण वाचा : शिवसेना ठाकरे गटाच्या पदाधिकाऱ्याचा दुर्दैवी मृत्यू; कुटुंबियांकडून पोलिसांवर गंभीर आरोप

सुधीर मुनगंटीवार यांची अनुपस्थिती

या संपूर्ण राजकीय घडामोडींमध्ये भाजपचे ज्येष्ठ नेते आणि माजी मंत्री सुधीर मुनगंटीवार यांची अनुपस्थिती लक्ष वेधून घेत आहे. स्थानिक राजकारणात त्यांच्या अनुपस्थितीमागील कारण अद्याप स्पष्ट झालेले नाही, परंतु यामुळे पक्षांतर्गत चर्चांना उधाण आले आहे.

संभाव्य परिस्थिती

चंद्रपूर महापालिकेत सत्तासंघर्ष अधिक तीव्र होण्याची शक्यता आहे. भाजप काँग्रेसला सत्तेपासून दूर ठेवण्यात यशस्वी ठरेल का, की काँग्रेस अंतर्गत वाद सांधून सत्तेवर येईल, याकडे संपूर्ण राज्याचे लक्ष लागले आहे. राजकीय हालचाली वेगाने सुरू असून, पुढील काही दिवसांतच स्पष्ट चित्र समोर येण्याची शक्यता आहे.

हे पण वाचा : ऐन निवडणुकीत उद्धव ठाकरेंना मोठा हादरा; माजी आमदाराने सोडली साथ, ‘या’ पक्षात केला प्रवेश