Champions Trophy 2025 Prize Money : आयसीसीने ८ वर्षांनंतर चॅम्पियन्स ट्रॉफी २०२५ चे आयोजन केले आहे. आज म्हणजेच रविवार ९ मार्च रोजी भारत आणि न्यूझीलंड यांच्यातील अंतिम सामना दुबईमध्ये खेळला जात आहे. या विजेतेपदाच्या सामन्यात जिंकणाऱ्या संघाला मोठी रक्कम मिळेल, तर पराभूत होणाऱ्या संघावरही पैशांचा वर्षाव होणार आहे. जाणून घ्या कोणाला किती रुपये बक्षीस मिळणार आहे.

विजेत्या-उपविजेत्या संघाला किती रुपये बक्षीस मिळणार?

चॅम्पियन्स ट्रॉफी २०२५ साठी बक्षीस रक्कम आयसीसीने आधीच जाहीर केली होती. आयसीसीने एक प्रेस रिलीज जारी करून म्हटले होते की, चॅम्पियन्स ट्रॉफीच्या विजेत्या संघाला २.२४ दशलक्ष अमेरिकन डॉलर्स म्हणजेच सुमारे २० कोटी रुपये बक्षीस मिळेल. त्याच वेळी, जेतेपदाच्या सामन्यात पराभूत होणारा संघही निराश होऊन परतणार नाही. उपविजेत्या संघाला १.१२ दशलक्ष अमेरिकन डॉलर्स म्हणजेच सुमारे १० कोटी रुपयांचे बक्षीस मिळेल.

उपांत्य फेरीत पराभूत झालेल्या संघांनाही मिळणार बक्षीस –

एवढेच नाही तर आयसीसी उपांत्य फेरीत पराभूत झालेल्या संघांनाही फूल ना फुलाची पाकळी म्हणून बक्षीस देणार आहे. पहिल्या उपांत्य फेरीत भारताकडून पराभूत झालेल्या ऑस्ट्रेलियाला आणि दुसऱ्या उपांत्य फेरीत न्यूझीलंडकडून पराभूत झालेल्या दक्षिण आफ्रिकेला प्रत्येकी $५६०,००० मिळतील. या स्पर्धेसाठी आयसीसीने ६.९ दशलक्ष अमेरिकन डॉलर्सची बक्षीस रक्कम निश्चित केली होती. २०१७ च्या स्पर्धेच्या तुलनेत बक्षीस रकमेत ५३ टक्के वाढ करण्यात आली.

याशिवाय, आयसीसी चॅम्पियन्स ट्रॉफीचा प्रत्येक सामना महत्त्वाचा होता. त्यामुळे गट टप्प्यातील प्रत्येक सामना जिंकणाऱ्या संघाला अतिरिक्त ३४ हजार अमेरिकन डॉलर्स म्हणजेच सुमारे ३० लाख रुपये मिळतील. यासोबतच स्पर्धेत सहभागी होण्यासाठी एक लाख २५ हजार अमेरिकन डॉलर्स देखील दिले जातील. यावेळी आयसीसीने पाचव्या, सहाव्या, सातव्या आणि आठव्या क्रमांकाच्या संघांसाठी बक्षीस रक्कमही राखून ठेवली आहे. अफगाणिस्तान आणि बांगलादेश पाचव्या आणि सहाव्या स्थानावर होते, तर इंग्लंड आणि पाकिस्तान सातव्या आणि आठव्या स्थानावर होते.