Chamari Athapaththu Takes 7 Wickets For 5 Runs Womens Asia Cup 2026 Sri Lanka vs Indonesia : संयुक्त अरब अमिरातीमध्ये सुरू असलेल्या महिला आशिया चषक २०२६ (Women’s Asia Cup 2026) स्पर्धेत क्रिकेट विश्वाने यापूर्वी कधीही न पाहिलेला महाचमत्कार घडला आहे. दुबई आंतरराष्ट्रीय स्टेडियमवर इंडोनेशियाविरुद्ध खेळताना श्रीलंकेची कर्णधार चमारी अटापट्टूने (Chamari Athapaththu) अवघ्या ५ धावा देऊन ७ फलंदाजांना बाद करत इतिहास रचला. महिला किंवा पुरुष आशिया चषकाच्या संपूर्ण इतिहासात एका सामन्यात ७ विकेट्स घेणारी ती जगातील पहिलीच गोलंदाज ठरली आहे.

३.३ षटकांत इंडोनेशियाचा फडशा; अवघ्या ४९ धावांत गुंडाळला संघ –

प्रथम फलंदाजी करताना श्रीलंकेची अवस्था बिकट झाली होती; मात्र निलाक्षिका सिल्वाच्या झुंजार ५० धावांच्या जोरावर त्यांनी १२४ धावांपर्यंत मजल मारली. प्रत्युत्तरात १२५ धावांचा पाठलाग करण्यासाठी उतरलेल्या इंडोनेशियाच्या फलंदाजांना अटापट्टूच्या फिरकीचे गूढ उकलताच आले नाही. चमारीने अवघ्या ३.३ षटकांत केवळ ५ धावांच्या मोबदल्यात इंडोनेशियाचा निम्मापेक्षा जास्त संघ एकटीने तंबूत पाठवला. इंडोनेशियाचा संपूर्ण डाव अवघ्या ४९ धावांवर गारद झाला आणि श्रीलंकेने हा सामना ७५ धावांनी एकतर्फी जिंकला.

ऐतिहासिक हॅटट्रिकसह रचला विक्रम; श्रीलंकेसाठी सर्वोत्कृष्ट स्पेल –

CHAMARI ATHAPATHTHU MAKES ASIA CUP HISTORY 🇱🇰 🔥

Sri Lanka superstar Chamari Athapaththu delivers a sensational 7-wicket haul for just 5 runs including a hat-trick against Indonesia. pic.twitter.com/0Y4MWDR9db

— Sri Lanka Tweet 🇱🇰 (@SriLankaTweet) September 3, 2026

या ऐतिहासिक स्पेलदरम्यान चमारी अटापट्टूने शानदार हॅटट्रिकही नोंदवली. आंतरराष्ट्रीय टी-२० क्रिकेटमध्ये हॅटट्रिक घेणारी ती श्रीलंकेची पहिलीच महिला गोलंदाज ठरली आहे. याशिवाय श्रीलंका क्रिकेटच्या इतिहासात महिला अथवा पुरुष कोणत्याही क्रिकेटपटूने आंतरराष्ट्रीय स्तरावर केलेली ही आजवरची सर्वोत्तम गोलंदाजीची कामगिरी (७/५) ठरली आहे. अटापट्टूने आशिया चषकातील मागील सर्व गोलंदाजीचे विक्रम एका झटक्यात मोडीत काढले आहेत.

हेही वाचा – Smriti Mandhana Century : स्मृती मानधनाचा वर्ल्ड रेकॉर्ड! हाँगकाँगविरुद्ध वादळी शतक ठोकत मोडले सर्वात मोठे दोन जागतिक विक्रम

जगातील अवघी दुसरी कर्णधार; विक्रमांच्या सुवर्णपानावर नाव कोरले –

Chamari Athapaththu’s 7/5, including a hat-trick, rewrites the Women’s Asia Cup record books. 📚

Watch #DPWorldWomensAsiaCup2026 LIVE on Sony Sports Network TV channels & Sony LIV.#SonySportsNetwork #SonyLIV #NotAGentlemansGame pic.twitter.com/nr0zQSRWR1

— Sony Sports Network (@SonySportsNetwk) September 2, 2026

आंतरराष्ट्रीय टी-२० क्रिकेटमध्ये कर्णधार म्हणून एकाच सामन्यात ७ विकेट्स टिपणारी चमारी ही जगातील अवघी दुसरी महिला कर्णधार बनली आहे. यापूर्वी २०२२ मध्ये अर्जेंटिनाची कर्णधार अ‍ॅलिसन स्टॉक्सने पेरूविरुद्ध ही किमया केली होती. फलंदाजीसोबतच आता चेंडूनेही जागतिक विक्रम नावावर करत चमारी अटापट्टूने आशियाई क्रीडा पटलावर स्वतःचा दरारा पुन्हा एकदा सिद्ध केला आहे.