Chain Snatching – पहाटे पतीसह चालण्यासाठी गेलेल्या महिलेच्या गळ्यातील अडीच तोळ्यांची सोनसाखळी हिसकावण्याचा प्रयत्न करणार्या अल्पवयीन चोरट्याला नागरिकांनी शिताफीने पकडून पोलिसांच्या ताब्यात दिले. ही घटना सोमवारी (दि. 16) पहाटे उरुळी कांचन येथे घडली. संबंधित महिलेच्या पतीच्या प्रसंगावधानामुळे चोरीचा डाव फसला असून पोलिसांनी आरोपीकडून सोन्याचे दागिने व दुचाकीसह सुमारे 2 लाख 70 हजार रुपयांचा मुद्देमाल जप्त केला आहे. याप्रकरणी जयश्री भरत काळे (वय 43, रा. काळेवाडा, उरुळी कांचन) यांनी उरुळी कांचन पोलीस ठाण्यात फिर्याद दिली आहे. त्यावरून पोलिसांनी एका अल्पवयीन चोरट्याला ताब्यात घेतले आहे.जयश्री काळे या आपल्या पती भरत लक्ष्मण काळे (वय 51) यांच्यासह सोमवारी पहाटे नेहमीप्रमाणे उरुळी कांचन येथील महात्मा गांधी विद्यालयाच्या मैदानावर चालण्यासाठी गेल्या होत्या. सकाळी सुमारे साडेसहा वाजण्याच्या सुमारास त्या शाळेच्या कोपर्याजवळ आल्या असताना काळा-लाल रंगाच्या बजाज पल्सर दुचाकीवरून आलेल्या एका युवकाने त्यांच्या गळ्यातील अडीच तोळे वजनाचे सोन्याचे मिनींगठण जबरदस्तीने हिसकावण्याचा प्रयत्न केला. यावेळी प्रसंगावधान राखत भरत काळे यांनी त्या दुचाकीला पाठीमागून पकडले. त्यामुळे दुचाकी खाली पडली व आरोपी पळून जाण्याचा प्रयत्न करू लागला. दरम्यान, जयश्री व भरत काळे यांनी मोठ्याने चोर चोर असा आरडाओरडा केल्याने परिसरातील नागरिक धावत आले. विजय कांचन व इतर नागरिकांच्या मदतीने त्या युवकाला पकडून पोलिसांच्या ताब्यात देण्यात आले. पावणेतीन लाखंचा मुद्देमाल जप्त आरोपी हा अल्पवयीन असून तो सांगसे (ता. मावळ, जि. पुणे) येथील रहिवासी असल्याचे समोर आले. पोलिसांनी त्याच्याकडून अडीच तोळे सोन्याचे मिनींगठण (सुमारे 2 लाख रुपये) तसेच एमएच 12 एमबीए 8007 क्रमांकाची 70 हजार रुपये किंमतीची बजाज पल्सर दुचाकी असा एकूण 2 लाख 70 हजार रुपयांचा मुद्देमाल जप्त केला आहे.