CET New Rules – राज्य सीईटी सेलतर्फे घेण्यात येणाऱ्या विविध व्यावसायिक अभ्यासक्रमांच्या प्रवेश परीक्षांच्या प्रक्रियेत यावेळी प्रथमच एक महत्त्वपूर्ण बदल करण्यात आला आहे. यावर्षी विद्यार्थ्यांना परीक्षेसाठी एक नव्हे, तर दोन टप्प्यांत प्रवेशपत्रे उपलब्ध करून दिली जाणार आहेत. यामध्ये एक अस्थायी म्हणजे प्रोव्हिजनल आणि एक अंतिम अशा दोन हॉल तिकिटांचा समावेश असेल. परीक्षेच्या शेवटच्या क्षणी केंद्र शोधण्यासाठी होणारी विद्यार्थ्यांची धावपळ थांबावी, या उद्देशाने हा निर्णय घेण्यात आला आहे. शैक्षणिक वर्ष २०२६-२७ साठी पदवी आणि पदव्युत्तर अशा एकूण १७ व्यावसायिक अभ्यासक्रमांच्या प्रवेशासाठीची सीईटी २४ मार्च २०२६ ते १६ मे २०२६ या कालावधीत होणार आहे. या नवीन बदलानुसार, ज्या विद्यार्थ्यांची परीक्षा असेल, त्या परीक्षेच्या साधारण ८ ते १० दिवस आधी त्यांच्या लॉगीनमध्ये अस्थायी प्रवेशपत्र उपलब्ध होईल. या प्रवेशपत्रामध्ये विद्यार्थ्याला परीक्षेसाठी नेमका कोणता जिल्हा आणि कोणते शहर मिळाले आहे, याची माहिती मिळेल. विद्यार्थी केंद्र निवडताना पसंतीक्रमानुसार चार जिल्ह्यांचे पर्याय देतात, त्यापैकी नक्की कुठे परीक्षा होणार आहे, हे या अस्थायी पत्रावरून स्पष्ट होईल. यामुळे परगावी केंद्र आलेल्या विद्यार्थ्यांना प्रवासाचे नियोजन करणे सोपे जाणार आहे. यानंतर, प्रत्यक्ष परीक्षेच्या केवळ ३ ते ४ दिवस आधी विद्यार्थ्यांना अंतिम प्रवेशपत्र दिले जाईल. या अंतिम हॉल तिकीटावर प्रत्यक्ष परीक्षा केंद्राचे नाव, पत्ता आणि केंद्राचा कोड दिला जाईल. विद्यार्थ्यांनी ही दोन्ही प्रवेशपत्रे नीट तपासून पाहणे आणि अंतिम प्रवेशपत्र डाउनलोड करणे अनिवार्य आहे. सध्या एमपीएड, एमएड आणि एम.एचएमसीटी या तीन अभ्यासक्रमांची अस्थायी प्रवेशपत्रे विद्यार्थ्यांच्या लॉगीनमध्ये उपलब्ध करून देण्यात आली आहेत. यामध्ये ‘एमपीएड’ची परीक्षा २४ मार्चपासून सुरू होत आहे. सीईटी कक्षाने सर्व विद्यार्थ्यांना अधिकृत संकेतस्थळाला नियमित भेट देण्याचे आवाहन केले आहे.
