NEET paper leak :  वैद्यकीय प्रवेशासाठी घेण्यात आलेल्या ‘नीट-यूजी २०२६’ परीक्षेच्या पेपरफुटी प्रकरणातील तेरा आरोपींविरोधात केंद्रीय अन्वेषण विभागाने (सीबीआय) न्यायालयात आरोपपत्र दाखल केले. यामध्ये नॅशनल टेस्टिंग एजन्सीचे (एनटीए) विषय तज्ज्ञ, मध्यस्थ आणि नामांकित कोचिंग क्लासेसच्या संचालकांचा समावेश आहे. सर्व आरोपी सध्या न्यायालयीन कोठडीत आहेत.

​सीबीआयने दिलेल्या माहितीनुसार, ३ मे २०२६ रोजी झालेल्या नीट परीक्षेत गैरव्यवहार आणि पेपर फुटल्याची तक्रार केंद्रीय शिक्षण मंत्रालयाच्या उच्च शिक्षण विभागाने १२ मे रोजी नोंदवली होती. त्यानुसार सीबीआयने तत्काळ गुन्हा दाखल करून ७२ अधिकारी आणि ८ सायबर फॉरेन्सिक तज्ज्ञांचा समावेश असलेली विशेष पथके तयार केली. महाराष्ट्र, राजस्थान, हरियाणा, दिल्लीसह देशातील ९२ ठिकाणी छापे टाकून संगणक, मोबाईल आणि इतर डिजिटल पुरावे जप्त करण्यात आले होते.

तपासादरम्यान सीबीआयने पेपरफुटीचा मुख्य स्रोत आणि परीक्षार्थींपर्यंत प्रश्नपत्रिका पोहोचवणारी संपूर्ण साखळी उघडकीस आणली आहे. या प्रकरणात १३ मे २०२६ रोजी पहिली अटक करण्यात आली होती. आरोपींची बँक खाती, लॉकर आणि डिमॅट खाती गोठवण्यात आली असून पैशांचा व्यवहार उघडकीस आला आहे.

फॉरेन्सिक रिपोर्ट आणि हस्ताक्षर तज्ज्ञांच्या अहवालावरून परीक्षेपूर्वीच प्रश्नपत्रिका फुटल्याचे सिद्ध झाले आहे. पुढील तपास आणि डिजिटल फॉरेन्सिक विश्लेषण अद्याप सुरू असून या प्रकरणातील एकाही दोषाला सोडले जाणार नाही, असा इशारा सीबीआयने दिला आहे.

प्रमुख आरोपी

एनटीएचे विषय तज्ज्ञ
१. मनीषा मांढरे – बायोलॉजी तज्ज्ञ
२. प्रल्हाद विठ्ठलराव कुलकर्णी – केमिस्ट्री तज्ज्ञ
३. मनीषा संजय हवालदार – फिजिक्स तज्ज्ञ

कोचिंग क्लास संचालक व अधिकारी
४. शिवराज रघुनाथ मोटेगावकर – ‘आरसीसी’ (रेणुकाई करिअर सेंटर) कोचिंग इन्स्टिट्यूट, लातूरचे संचालक
५. तेजस हर्षदकुमार शाह – ‘अभंग प्रभू मेडिकल अकादमी’ कोचिंग इन्स्टिट्यूट, पुणे येथील फिजिक्स प्राध्यापक आणि सीओओ

​मध्यस्थ
६. मनीषा संजय वाघमारे
७. धनंजय निवृत्ती लोखंडे
८. शुभम मधुकर खैरनार
९. यश यादव
१०. मांगीलाल बिवाल
११. विकास बिवाल
१२. दिनेश बिवाल
१३. डॉ. मनोज भगवानराव शिरुरे

आरोपात्रातील मुद्दे
– आरोपींविरोधात भारतीय न्याय संहितेअंतर्गत गुन्हेगारी कट रचणे, फसवणूक, विश्वासघात, पुरावा नष्ट करणे आणि भ्रष्टाचार प्रतिबंधक कायदा आणि सार्वजनिक परीक्षा (अनुचित प्रकारास प्रतिबंध) कायदा २०२४ अंतर्गत गुन्हे दाखल.
– ३६० जणांचे जबाब नोंदवले
– ४२२ पुरावे न्यायालयात सादर
– ४३ वस्तू जप्त

Nevase News : राहुरी- शनिशिंगणापूर नियोजित रेल्वे मार्ग रद्द करण्याची मागणी; आमदारांसह पालकमंत्र्यांनी घेतली मुख्यमंत्र्यांची भेट