जेरुसलेम : israel hezbollah war – इस्रायल आणि हिजबुल्लाह यांच्यातील ‘विघातक युद्ध’ सुरू झाल्याने मध्यपूर्वेत प्रचंड भीतीचे वातावरण निर्माण झाले आहे. इस्रायली लष्कराने हिजबुल्लाहवर जोरदार हल्ला चढवला आहे. यामध्ये किमान 100 जणांचा मृत्यू झाला आहे. तसेच हिजबुल्लाहचे 300 हून अधिक तळ उद्ध्वस्त करण्यात आले आहेत.

लेबनॉनमध्ये पेजर ब्लास्ट आणि वॉकी-टॉकी स्फोटानंतर दुसऱ्याच दिवशी इस्रायली हल्ल्यामुळे सैरभैर झालेल्या हिजबुल्लाने रविवारी आणि सोमवारी जेरुसलेमवर प्राणघातक हल्ला केला. उत्तर आणि दक्षिण इस्रायल हिजबुल्लाहच्या भीषण पलटवाराने हादरले. स्फोटांनंतर लागलेल्या आगीत कागदाच्या पाणांसारख्या मोठ्या इमारती जळून खाक झाल्या. यामुळे हताश झालेल्या इस्रायली लष्कराने आता हिजबुल्लाहवर सर्वात मोठा हल्ला चढवला आहे. यामुळे मध्यपूर्वेतील देशांमध्ये खळबळ उडाली आहे. इस्त्रायली सैन्य आणि हिजबुल्हाह दोघेही सातत्याने एकमेकांवर हल्ले करत आहेत.

हिजबुल्लाहच्या हल्ल्यांना प्रत्युत्तर म्हणून, इस्रायली सैन्याने लेबनॉनमधील लोकांना हिजबुल्लाह दहशतवादी गटाने शस्त्रे साठवलेली घरे आणि इमारती त्वरित रिकामी करण्यास सांगितले आहे. इस्रायलने दहशतवादी गटाच्या विरोधात “व्यापक हल्ले” सुरू केल्याचे सांगितले. सीमेवर सुमारे वर्षभराच्या संघर्षानंतर आणि विशेषत: रविवारी झालेल्या जोरदार गोळीबारानंतर अशा प्रकारचा हा पहिलाच इशारा आहे. साहजिकच इस्रायल हिजबुल्लावर आणखी अनेक मोठे हल्ले करू शकतो. नुकत्याच झालेल्या इस्रायली हल्ल्यात हिजबुल्लाहने आपला एक प्रमुख कमांडर आणि अनेक लढवय्ये ठार झाल्यानंतर बदला म्हणून इस्रायलच्या उत्तरेकडील भागाला लक्ष्य करून 100 हून अधिक रॉकेट, क्षेपणास्त्रे आणि ड्रोन डागले होते.

इस्रायल-हिजबुल्लात ‘विघातक युद्ध’ सुरू –

या हल्ल्यांमुळे आणि प्रतिहल्ल्यांमुळे इस्रायल आणि हिजबुल्ला यांच्यात व्यापक युद्ध होण्याची शक्यता बळावली आहे. तेही अशा परिस्थितीत जेव्हा इस्रायल आधीच गाझामध्ये पॅलेस्टिनी हमासविरुद्ध लढत आहे. 7 ऑक्टोबरच्या हल्ल्यात अनेक ओलीसांना परत मिळवून देण्याचा प्रयत्न करत आहे. हिजबुल्लाहने सहकारी इराण-समर्थित दहशतवादी गट हमास आणि पॅलेस्टिनी यांच्याशी एकजुटीने आपले हल्ले सुरू ठेवण्याचे वचन दिले आहे.

इस्रायलच्या लष्करी अधिकाऱ्याने सांगितले की, इस्रायलचे लक्ष हवाई कारवायांवर आहे आणि जमिनीवर हल्ला करण्याची त्यांची तात्काळ योजना नाही. अधिकाऱ्याने नाव न सांगण्याच्या अटीवर सांगितले की, इस्रायलवर अधिक हल्ले करण्याच्या हिजबुल्लाहच्या क्षमतेला आळा घालण्यासाठी या हल्ल्यांचा उद्देश आहे.