परभणी – परभणी जिल्हाधिकारी कार्यालयासमोरील डॉ. बाबासाहेब आंबेडकर यांच्या पुतळ्यासमोर असणाऱ्या संविधानाच्या प्रतिकृतीची काच मनोरुग्णाने फोडली होती. त्यावरून संतप्त झालेल्या जमावाने पोलिसांसमक्ष या व्यक्तीला अमानुष मारहाण केली. पेट्रोल टाकून जिवंत जाळण्याचा प्रयत्न करण्यात आला. पोलिसांनी वेळीच हस्तक्षेप केल्याने त्याचा जीव वाचला. सोमवारी सायंकाळी 5.30 च्या सुमारास ही घटना घडली होती. सोपान दत्तराव पवार (45) असे आरोपीचे नाव आहे. तो मनोरुग्ण असल्याचे पोलिसांनी सांगितले. त्याला अटक करून रुग्णालयात दाखल केले. दरम्यान, जिल्हाधिकारी कार्यालयासमोरील संविधानाच्या प्रतिकृतीवरील काच फुटल्यानंतर कपड्याने ही प्रतिकृती झाकून ठेवण्यात आली आहे.

परभणीमध्ये आज बुधवारी आंबेडकरी अनुयायांकडून बंद पुकारण्यात आला होता. खबरदारीचा उपाय म्हणून प्रशासनाच्या वतीने जिल्ह्यात जमावबंदीचे आदेश लागू करण्यात आले होते. परंतु, या आदेशाला न जुमानता शहरातील डॉ.बाबासाहेब आंबेडकर पुतळ्याशेजारी मोठ्या प्रमाणात जमाव जमला होता. त्यामुळे कायदा व सुव्यवस्थेचा प्रश्न निर्माण होऊ नये, यासाठी प्रशासनाच्या वतीने जिल्ह्यात संचारबंदी लागू करण्यात आली आहे. तसेच परिस्थिती पाहता जिल्हा प्रशासनाच्या वतीने बुधवारी दुपारी 1 वाजेपासून इंटरनेट सेवा बंद करण्यात आली आहे. पुढील आदेश येईपर्यंत इंटरनेट सेवा बंद राहील, असे जिल्हा प्रशासनाच्या वतीने एका पत्रकाद्वारे सांगण्यात आले आहे.

परभणीतील बंदला हिंसक वळण लागले आहे. आंदोलकांकडून शहरातील काही दुकानांची तोडफोड करण्यात आली. तर काही ठिकाणी वाहनांची जाळपोळ करण्यात आली आहे. जमाव पांगवण्यासाठी पोलिसांकडून अश्रू धुरांच्या नळकांड्या फोडण्यात आल्या. मात्र, जमावाकडून पोलिसांच्या दिशेने दगडफेक करण्यात आली. दंगल नियंत्रक पथकाला पाचारण करण्यात आले असून परिस्थिती नियंत्रणात आली आहे.

दरम्यान, आंदोलकांमध्ये महिलांचा देखील समावेश आहे. अनेक महिला रस्त्यावर उतरल्या. त्यांनीही पोलिसांच्या दिशेने दगडफेक केली. परभणी बंद असताना जी दुकाने सुरू होती, अशी दुकाने आंदोलकांनी पेटवून दिल्याची माहिती आहे. शहराच्या मध्यवर्ती भागात हा प्रकार घडला.

परभणी शहरातील सात ठिकाणी जाळपोळ करण्यात आली. अनेक ठिकाणी बॅनरची तोडफोड करून रस्त्यावर पेटून देण्यात आले आहेत. अग्निशमन दलाच्या वतीने या आगीवर नियंत्रण मिळवण्यासाठी प्रयत्न सुरू आहेत. परभणीतील आंदोलनाला हिंसक वळण आले असून ठिकठिकाणी जाळपोळ करण्यात येत आहे. त्यामुळे पोलिसांकडून परभणीतील रस्त्यावर मार्च काढण्यात येत आहे.

The vandalisation of the Constitution of India at Babasaheb’s statue by casteist Maratha miscreants in Parbhani is absolutely very shameful to say the least.

It is not the first time such a vandalism of Babasaheb’s statue or symbol of Dalit identity has happened.

VBA Parbhani…

— Prakash Ambedkar (@Prksh_Ambedkar) December 11, 2024

24 तासांत आरोपींना अटक करण्यात आली नाही, तर गंभीर परिणाम  – प्रकाश आंबेडकर

परभणीतील घटनेबाबत वंचित बहुजन आघाडीचे नेते प्रकाश आंबेडकर यांनी ट्विट करून इशारा दिला आहे. आंबेडकर यांनी आपल्या ट्विटमध्ये म्हटले आहे की, परभणीत मराठा जातीयवादी समाजकंटकांनी बाबासाहेबांच्या पुतळ्यापुढील भारतीय राज्य घटनेची केलेली तोडफोड अत्यंत लज्जास्पद गोष्ट आहे. बाबासाहेबांच्या पुतळ्याची किंवा दलित अस्मितेच्या प्रतिकाची अशी तोडफोड होण्याची ही पहिलीच घटना नाही. वंचित बहुजन आघाडीच्या परभणी जिल्हा कार्याकर्त्यांनी सर्वप्रथम घटनास्थळी पोहोचले. त्यांनी केलेल्या विरोध प्रदर्शनामुळे पोलिसांनी या प्रकरणी एफआयआर दाखल करून एका समाजकंटकाला अटक केली. मी सर्वांना कायदा व सुव्यवस्था राखण्याचे आवाहन करतो, असे प्रकाश आंबेडकर यांनी आपल्या ट्विटमध्ये म्हटले आहे. पुढील 24 तासांत आरोपींना अटक करण्यात आली नाही, तर त्याचे गंभीर परिणाम भोगावे लागतील, असा इशाराही त्यांनी दिला आहे.

काँग्रेस नेते विजय वडेट्टीवार यांची प्रतिक्रिया –

सदर घटना उघडकीस आल्यानंतर प्रशासन आणि पोलिस दलाने तात्काळ योग्य कारवाई करायला हवी होती. मात्र ते न झाल्यामुळे आज परिस्थिती चिघळली असल्याचे काँग्रेस नेते विजय वडेट्टीवार म्हणाले. पोलिसांनी संविधानाच्या प्रतीकृतीची विटंबना करणाऱ्यांवर कठोर कारवाई केली पाहिजे. तसेच सरकारने जनतेला अश्वासित करावे, अशी मागणीही त्यांनी केली. तसेच संविधान प्रेमी जनतेने देखील शांतता आणि संयम बाळगावा आणि प्रशासनाला सहकार्य करावे, असे आवाहन विजय वडेट्टीवार यांनी केले आहे.

भाजप नेते प्रविण दरेकर यांची प्रतिक्रिया –

बाबासाहेब आंबेडकरांच्या राज्यघटनेचा अवमान सहन केला जाणार नाही. परभणीत घडलेल्या घटनेचा मी तीव्र निषेध करतो. पंतप्रधान नरेंद्र मोदी आणि मुख्यमंत्री देवेंद्र फडणवीस यांनी नेहमीच संविधानाचा आदर केला आहे. संविधानाशी छेडछाड करण्याचा प्रयत्न करणाऱ्या अराजक घटकांवर कठोर कारवाई केली जाईल, अशी प्रतिक्रिया भाजप नेते प्रविण दरेकर यांनी दिली आहे.

अफवांवर विश्वास ठेवू नका – जिल्हाधिकारी

कायदा-सुव्यवस्था बिघडणार नाही, याची दक्षता घ्यावी, असे आवाहन परभणीच्या जिल्हाधिकऱ्यांनी आंदोलकांना केले आहे. सदरील ठिकाणी आम्ही स्वत: भेट दिली आहे. परिस्थिती नियंत्रणात आहे. अफवांवर विश्वास ठेवून कुठलेही गैरकृत्य करू नये. कुठल्याही समाजाच्या भावना दुखावणार नाही, याची दक्षता घ्यावी, असे म्हणत आंदोलकांना शांत राहण्याचे आवाहन जिल्हाधिकाऱ्यांनी केले आहे.

काल झालेली घटना दुर्दैवी – खासदार संजय जाधव

काल झालेली घटना ही दुर्दैवी आहे. या घटनेचा मी निषेध करतो. पण आता जी काही परिस्थिती आहे, ती शांततेने हाताळावी. या घटनेचा निषेध नोंदवताना इतरांना जो काही त्रास होणार नाही याचीही आपण काळजी घेतली पाहिजे, असे आवाहन परभणीचे खासदार संजय जाधव केले आहे.