नवी दिल्ली – गोलंदाजांसह फलंदाजांनीही केलेल्या सातत्यपूर्ण कामगिरीच्या जोरावर यजमान भारतीय संघाने दक्षिण आफ्रिकेचा निर्णायक एकदिवसीय सामन्यात 7 गडी राखून पराभव केला. या विजयासह भारतीय संघाने टी-20 पाठोपाठ तिन एकदिवसीय सामन्यांची मालिकाही 2-1 अशाच फरकाने जिंकली.

भारतीय संघाचा कर्णधार शिखऱ धवनने नाणेफेक जिंकत दक्षिण आफ्रिकेला पहिल्यांदा फलंदाजी दिली. कुलदीप यादवने 4 गडी बाद करत आपले वर्चस्व सिद्ध केले. त्याला सुरेख साथ देताना महंमद सिराज, शाहबाज अहमद व वॉशिंग्टन सुंदर यांनी प्रत्येकी 2 बळी घेतले. दक्षिण आफ्रिकेचे प्रमुख फलंदाज अपयशी ठरल्यावर हेनरीच क्‍लासेनने 34 धावांची खेळी केली. तसेच जनेमान मलानने 15 तर तळात मार्को जेन्सनने 14 धावांची खेळी केल्याने त्यांचा डाव 28 व्या षटकात 99 धावांवर संपला.

For his terrific 4-wicket haul, @imkuldeep18 bags the Player of the Match award in the #INDvSA decider 👏👏#TeamIndia pic.twitter.com/L8Oa6EI0Mf

— BCCI (@BCCI) October 11, 2022

विजयासाठी 100 धावांचा पाठलाग करताना भारताचा कर्णधार व सलामीवीर धवनने शुभमन गिलच्या साथीत 42 धावांची सलामी दिली. मात्र, धवन अवघ्या 8 धावांवर धावबाद होऊन परतला. गिलने इशान किशनच्या साथीत संघाचे अर्धशतक फलकावर लावले. इशानही अनावश्‍यक फटका मारण्याच्या प्रयत्नात 10 धावांवर बाद झाला.

त्यानंतर गिलने श्रेयस अय्यरसह डाव सावरला. गिल चांगला खेळत असताना ऍक्रॉस खेळताना 49 धावांवर पायचित बाद झाला. त्याचे अर्धशतक अवघ्या एका धावेने हुकले. त्याने 57 चेंडूत 10 चौकार फटकावले. तो बाद झाल्यावर अय्यरने आक्रमक फलंदाजी करताना संजू सॅमसनसह संघाचा विजय साकार केला. अय्यरने नाबाद 28 धावांच्या खेळीत 23 चेंडूंचा सामना करताना 3 चौकार व 2 षटकार फटकावले. सॅमसन 2 धावांवर नाबाद राहिला. दक्षिण आफ्रिकेकडून बिजोन फॉर्च्युन व लुंगी एन्जीडी यांनी प्रत्येकी 1 गडी बाद केला.

संक्षिप्त धावफलक –

दक्षिण आफ्रिका – 27.1 षटकांत सर्वबाद 99 धावा. (हेनरीच क्‍लासेन 34, जनेमान मलान 15, मार्को जेन्सन 14, कुलदीप यादव 4-18, वॉशिंग्टन सुंदर 2-15, महंमद सिराज 2-17, शाहबाज अहमद 2-32).

भारत – 19.1 षटकांत 3 बाद 105 धावा. (शुभमन गिल 49, श्रेयस अय्यर नाबाद 28, बिजोन फॉर्च्युन 1-20, लुंगी एन्जीडी 1-21).