Maharashtra Loksabha Election| लोकसभेच्या निवडणूकाचे वेळापत्रक जाहीर झाल्यानंतरही अद्याप महायुतीच्या जागा वाटपाचा तिढा सुटलेला नाही. शनिवारी केंद्रीय गृहमंत्री अमित शहा यांच्यासोबत झालेल्या महत्वाची बैठकीत शिवसेनेला 13 जागा मिळण्याची शक्यता आहे. याबाबत भाजप हायकमांडने सहमती दर्शवली असल्याचे समोर आले आहे. परंतु यात शिवसेना शिंदे गटाच्या पाच विद्यमान खासदारांची उमेदवारी धोक्यात येण्याची शक्यता असल्याची चर्चा आहे.

अमित शाह यांच्यासोबत झालेल्या या बैठकीला मुख्यमंत्री एकनाथ शिंदे उपमुख्यमंत्री देवेंद्र फडणवीस आणि अजित पवार यांची उपस्थिती होती. बैठकीत जागावाटपावर शिक्कामोर्तब झाल्याची माहिती आहे. यातील 5 जागांवरील उमेदवार बदलण्याची अट घालण्यात आली आहे. यात शिंदे गटाचे विद्यमान खासदार भावना गवळी, गजानन कीर्तीकर कृपाल तुमाने, हेमंत पाटील आणि सदाशिव लोखंडे यांची उमेदवारी धोक्यात असल्याची शक्यता वर्तवली जात आहे.

कसा असणार फॉर्म्युला?

दरम्यान, या बैठकीत जागा वाटवाटपाबाबत निश्चित झाल्याचे म्हंटले जात आहे. महायुतीचा जागावाटपाचा फॉर्म्युला 30-13-4-1 असा असणार आहे. भाजप लोकसभेच्या 30 जागांवर निवडणूक लढवणार आहे. तर शिंदे गटाला 13 जागा, अजित पवार गटाला 4  जागा आणि राज ठाकरे यांच्या मनसेला 1 जागा मिळणार असल्याची माहिती आहे.

दरम्यान, भाजपकडून 20 जागांवरील उमेदवार जाहीर करण्यात आले आहेत. मात्र महायुतीतील काही जागांबाबत अजून निश्चित निर्णय घेतला जात नसल्याने शिंदे गट आणि अजित पवार गटात अस्वस्थता असल्याची माहिती आहे.

हेही वाचा: 

महायुतीत जागावाटपासाठी ‘शिंदे पवारां’ची तिसऱ्यांदा ‘दिल्लीवारी’ नेमक्या किती जागांवर होणार ‘चर्चा’ ?