Budget 2025 । केंद्रीय अर्थमंत्री निर्मला सीतारमण १ फेब्रुवारी रोजी संसदेत अर्थसंकल्प सादर करतील. यापूर्वी एका सर्वेक्षणात अर्थसंकल्पाबद्दल लोकांमध्ये निराशा दिसून आली होती. सी-व्होटर सर्वेक्षणात, बहुतेक लोकांनी म्हटले आहे की महागाईमुळे घर चालवणेदेखील सध्या कठीण होत आहे. तसेच भविष्यात परिस्थिती सुधारेल अशी त्यांना अपेक्षा नाही.

सी-व्होटरने त्यांच्या प्री-बजेट सर्वेक्षणात, देशाच्या विविध भागांतील ५,२६९ लोकांशी संवाद साधला. यामध्ये लोकांनी धक्कादायक उत्तरे दिली. जवळजवळ दोन तृतीयांश लोकांनी सांगितले की, महागाईकडे कोणीही लक्ष देत नाही आणि मोदी पंतप्रधान झाल्यानंतर ती सतत वाढत आहे. अर्ध्याहून अधिक लोकांनी सांगितले की, वाढत्या महागाईचा त्यांच्या राहणीमानावर विपरीत परिणाम होत आहे, त्यांना चांगले जीवन जगणे कठीण होत आहे.

‘हे वर्ष आणखी वाईट होणार? ‘ Budget 2025 । 
या सर्वेक्षणात, सुमारे अर्ध्या लोकांनी असेही म्हटले आहे की त्यांचे उत्पन्न जसे होते तसेच राहिले आहे, कोणताही बदल झाला नाही परंतु गेल्या वर्षात खर्च वाढतच राहिला. दोन तृतीयांश लोकांनी असेही म्हटले आहे की, वाढत्या खर्चाचे व्यवस्थापन करणे आता कठीण होत आहे. ३७% लोकांनी असेही म्हटले की या वर्षीही परिस्थिती सुधारण्याची त्यांना फारशी आशा नाही. त्यांच्या मते, येणारे वर्ष उत्पन्न आणि खर्चाच्या गुणोत्तराच्या बाबतीत आणखी वाईट असू शकते.

विकास दर कमी राहण्याची अपेक्षा Budget 2025 । 
भारत ही जगातील पाचवी सर्वात मोठी अर्थव्यवस्था आहे परंतु या आर्थिक वर्षात तिचा विकास दर गेल्या चार वर्षातील सर्वात कमी असण्याची अपेक्षा आहे. अशा परिस्थितीत, या आठवड्यात सादर होणाऱ्या अर्थसंकल्पात, मोदी सरकार विकास दर वाढवण्यासाठी काही विशेष उपाययोजना जाहीर करू शकते. यासोबतच, लोकांचे उत्पन्न वाढवण्यासाठी आणि महागाई नियंत्रणात ठेवण्याच्या प्रयत्नांचा एक भाग म्हणून काही घोषणा देखील केल्या जाऊ शकतात. सध्या भारतात बेरोजगारी ही देखील एक मोठी समस्या आहे. नवीन रोजगार निर्मितीच्या क्षेत्रातही सरकारला अर्थसंकल्पात काही उपाययोजना कराव्या लागतील.

हेही वाचा
Kumbhmela : …अन् योगी आदित्यनाथ भावूक; रात्री उशिरा बैठकांचे सत्र, घेतले ‘हे’ मोठे निर्णय