पुणेः गेल्या काही दिवसांपासून शहरात गुन्हेगारीने डोकं वर काढले असून रोज अनेक थरारक अशा गुन्ह्याच्या घटना घडत आहेत.  वाघोली येथील नगर रस्त्यावरील वाघेश्वरनगर भागात देखील अशीच थरारक खूनाची घटना घडली आहे. मुलीसोबत बोलत असल्याच्या रागातून एका अल्पवयीन मुलाची लोखंडी रॅाड आणि दगडाने अत्यंत निर्घूणपणे हत्या करण्यात आल्याची प्राथमिक माहिती सांगण्यात येत आहे. ही घटना मंगळवारी मध्यरात्री साडे बाराच्या सुमारास घडली आहे.

या प्रकरणी पोलिसांनी लक्ष्मण पेटकर (वय ६०), नितीन पेटकर (वय ३१) आणि सुधीर पेटकर (वय ३२) यांना ताब्यात घेतले असून, त्यांच्यावर वाघोली पोलीस स्टेशनमध्ये गुन्हा दाखल करण्यात आला आहे. गणेश वाघू तांडे (१७) असे हत्या झालेल्या अल्पवयीन मुलाचे नाव आहे. पोलिसांनी दिलेल्या माहितीनुसार, गणेश तांडे याचे कुटूंब व पेटकर कुटूंब हे एकाच भागात राहण्यास आहे. गणेश हा पेटकर यांच्या मुलीशी बोलत असल्याचा संशय कुटूंबियांना होता. त्याचा राग आरोपींच्या मनात असल्याने ही हत्या करण्यात आलेचे सांगण्यात आले आहे.

घटनेने परिसरात भीतीचे वातावरण 

मंगळवारी रात्री साडे बाराच्या सुमारास गणेश हा नेहमीप्रमाणे मित्रासोबत वस्तीत थांबलेला असताना अचानक गणेशला तिघांनी गाठत त्याच्यावर लोखंडी रॉड आणि दगडाने हल्ला चढविला. हा हल्ला इतका भयंकर होता की या घटनेत गणेशचा जागीच मृत्यू झाला. या घटनेची माहिती वाघोली पोलिसांना मिळाताच पोलीसांनी घटनास्थळी धाव घेतली. या प्रकरणी तिघांना पोलिसांनी ताब्यात घेतले आहे. या हत्येच्या घटनेमुळे परिसरात भीतीचे वातावरण असून परिसरावर शोककळा पसरली आहे.