Border-Gavaskar Trophy 2024/25 (AUS vs IND) :– भारताची रनमशीन असलेला विराट कोहलीने आतापर्यंत ऑस्ट्रेलियाविरुद्ध खेळताना नेहमीच दमदार कामगिरी केली आहे. त्याने मायदेशात व ऑस्ट्रेलियात खेळताना अनेकदा कांगारूंच्या गोलंदाजांचा घाम काढला आहे. यापूर्वीच्या ऑस्ट्रेलिया दौऱ्यामध्ये देखील विराट कोहलीने खोऱ्याने धावा काढल्या आहेत. त्यामुळे 22 नोव्हेंबरपासून सुरु होणाऱ्या बॉर्डर गावस्कर करंडक स्पर्धेत धावांसाठी झगडणारा कोहली पुन्हा लयीत परतु शकतो. यासाठीच त्याला झटपट बाद करण्यासाठी सर्व प्रकारच्या पद्धती वापराव्यात असा सल्ला ऑस्ट्रेलियाचा माजी यष्टीरक्षक इयान हिलीने गोलंदाजांना दिला.

कोहली, गेल्या काही कसोटी लढतीमध्ये धावासाठी संघर्ष करत आहे. त्याने मागील ६० कसोटी डावांमध्ये केवळ ११ अर्धशतके व २ शतके झळकावली आहेत. मात्र, त्याने यापूर्वी ऑस्ट्रेलियामध्ये खेळताना चमकदार कामगिरी केली होती. त्याने ५४ पेक्षा अधिकच्या सरासरीने धावा काढल्या आहेत. मात्र धावांसाठी झगडणाऱ्या कोहलीला यावेळी पॅट कमिन्स, जोश हेझलवूड आणि मिचेल स्टार्क या ऑस्ट्रेलियाच्या वेगवान त्रिकुटाचा सामना करावा लागणार आहे. या त्रिकुटाला कोहलीला बाद असे करायचे याचा सल्ला इयान हिलीने दिला आहे.

हिली म्हणाला, कोहलीच्या बॅटमधून सध्या धावा येत नाहीत. त्यामुळे त्याच्या पुढच्या पॅडवर सातत्याने लक्ष्य करणे अपेक्षित आहे. तो फलंदाजी करताना पुढच्या पायाचा वापर जास्त करतो, त्यामुळे चेंडू तडकावण्याचे अनेक पर्याय उपलब्ध होतात. वेगाने येणारे चेंडूंना तो चांगल्या प्रकारे खेळू शकतो, त्यामुळे त्याच्या पुढच्या पॅडवर येणारा चेंडू त्याला बाद देखील करू शकतो, असे हिलीने ‘सेन रेडिओ’शी बोलताना सांगितले.

Border-Gavaskar Trophy 2024/25 : भारत-ऑस्ट्रेलिया मालिकेत चेतेश्वर पुजारा दिसणार एका नव्या भूमिकेत…

ऑस्ट्रेलियाच्या वेगवान त्रिकुटाला ही रणनीती जास्त काळ वापरता येणार नाही. कोहली आंतरराष्ट्रीय फलंदाज आहे. काही काळानंतर त्याला या रणनीतीची सवय होईल, आणि तो पुन्हा धावा करण्यास सुरुवात करेल. त्यामुळे ही रणनीती उपयोगात येत नसेल तर थेट त्याच्या शरीराचा निशाणा साधणारी (बॉडीलाईन) गोलंदाजी करावी, असा सल्ला देखील हिली यांनी दिला. बॉडीलाईन वर गोलंदाजी करताना शॉर्टलेगवर क्षेत्ररक्षक ठेवून दबाव निर्माण करता येऊ शकतो. अशा चेंडूंवर पूल शॉटचा वापर करण्यात येतो. मात्र, त्यावर नियंत्रण ठेवणे अवघड असल्याने अनेकदा खेळाडू अशा चेंडूंवर बाद होत होतात.