Satara: जिल्ह्यातील आरोग्यसेवा अधिक सक्षम करण्याच्यासाठी सार्वजनिक बांधकाम मंत्री शिवेंद्रसिंहराजे भोसले यांच्या पाठपुराव्यामुळे आरोग्य विभागाने महत्वपूर्ण निर्णय घेतला आहे. जिल्ह्यातील आरोग्य यंत्रणेमध्ये नवीन 48 डॉक्टरांची नियुक्ती करण्यात आली आहे. त्याबद्दल ना. शिवेंद्रसिंहराजेंनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, ना. सुनेत्रा पवार आणि आरोग्य मंत्री प्रकाश आबिटकर यांचे आभार मानले आहेत.

सातारा येथील क्रांतिसिंह नाना पाटील जिल्हा रुग्णालय, जिल्हा स्त्री रुग्णालय आणि सातारा-जावळी मतदारसंघातील शासकीय रुग्णालयांमध्ये डॉक्टरांची अनेक पदे रिक्त असल्याने, रुग्णसेवेत अनेक अडचणी येत होत्या. सध्या नियुक्त डॉक्टरांवर कामाचा ताण येत होता. हे लक्षात घेऊन ना. शिवेंद्रसिंहराजे यांनी आरोग्य मंत्री आबिटकर यांच्याशी अनेकदा चर्चा केली. शासन स्तरावर बैठक घेऊन हा प्रश्न सोडवण्यासाठी पाठपुरावा केला. या प्रयत्नांना यश आले असून, आरोग्य विभागाने जिल्ह्यात नवीन 48 डॉक्टरांची नियुक्ती केली आहे. यामध्ये स्त्रीरोग तज्ज्ञ, हृदयरोग तज्ज्ञ, बालरोग तज्ज्ञ, अस्थिरोग तज्ज्ञ आदींचा समावेश आहे.

जिल्हा रुग्णालयात दहा, जिल्हा स्त्री रुग्णालयात पाच, सातारा आणि जावळी तालुक्यात प्रत्येकी चार डॉक्टरांची नियुक्ती करण्यात आली आहे. उर्वरित डॉक्टरांची नियुक्ती जिल्ह्यातील इतर ठिकाणी करण्यात येणार आहे. या नियुक्तीमुळे शासकीय रुग्णालयांमधील मनुष्यबळाची कमतरता दूर होणार असून, रुग्णांना अधिक दर्जेदार वैद्यकीय सेवासुविधा मिळण्यास मोठा हातभार लागणार आहे. ना. शिवेंद्रसिंहराजे भोसले यांच्या पुढाकारामुळे सातारा जिल्ह्याच्या आरोग्यसेवेला मिळालेले हे बळ सर्वसामान्य रुग्णांसाठी दिलासादायक ठरणार आहे.