Bombay High Court: मुंबई उच्च न्यायालयाच्या गोवा खंडपीठाने २०१३ च्या बलात्कार प्रकरणात ‘तेहलका’चे माजी संपादक तरुण तेजपाल यांना मोठा धक्का दिला आहे. खंडपीठाने कनिष्ठ न्यायालयाचा निर्दोष मुक्ततेचा निर्णय रद्द केला आहे.

उच्च न्यायालयाने गोवा सरकारचे अपील स्वीकारून तेजपाल यांना दोषी ठरवले. आता न्यायालय शिक्षेच्या मुद्द्यावर स्वतंत्रपणे सुनावणी घेणार आहे. न्यायमूर्ती नीला गोखले आणि न्यायमूर्ती अमित जामसांदेकर यांच्या खंडपीठाने हा निकाल दिला.

निकाल सुनावताना तरुण तेजपाल न्यायालयात उपस्थित होते. सविस्तर आदेश अद्याप जारी व्हायचा आहे.

नेमकं काय आहे प्रकरण ?  (Bombay High Court)

हे प्रकरण नोव्हेंबर २०१३ चे आहे, जेव्हा ‘तेहलका’मधील एका कनिष्ठ महिला सहकाऱ्याने गोव्यातील ‘थिंक’ महोत्सवादरम्यान तरुण तेजपाल यांच्यावर लैंगिक छळ आणि बलात्काराचा आरोप केला होता. गोवा पोलिसांनी या प्रकरणात स्वतःहून एफआयआर दाखल केला आणि त्यानंतर तेजपाल यांना अटक करण्यात आली.

 

मे २०२१ मध्ये, म्हापसा सत्र न्यायालयाने पुराव्याचा अभाव आणि संशयाचा फायदा या कारणास्तव तरुण तेजपाल यांना सर्व आरोपांमधून निर्दोष मुक्त केले. गोवा सरकारने याविरोधात मुंबई उच्च न्यायालयात अपील दाखल केले.

सुनावणीदरम्यान, राज्य सरकारने असा युक्तिवाद केला की, कनिष्ठ न्यायालयाने उपलब्ध पुराव्यांचे योग्य मूल्यांकन करण्याऐवजी, पीडितेच्या वागणुकीवर आणि पार्श्वभूमीवर जास्त लक्ष केंद्रित केले आणि तेजपाल यांच्या माफीच्या ईमेलसह महत्त्वपूर्ण पुराव्यांकडे दुर्लक्ष केले.

उच्च न्यायालयाने राज्याचे अपील स्वीकारले, निर्दोष मुक्ततेचा निर्णय रद्द केला आणि तेजपाल यांना दोषी ठरवले. आता न्यायालय शिक्षेच्या कालावधीच्या मुद्द्यावर स्वतंत्रपणे सुनावणी घेईल.  (Bombay High Court)