High Court : महाराष्ट्र अन्न व औषध प्रशासनाने (FDA) मुंबई क्रिकेट असोसिएशनच्या (MCA) परिसरातील पाच रेस्टॉरंटचे परवाने निलंबित करण्याच्या निर्णयाला मुंबई उच्च न्यायालयाने शनिवारी स्थगिती देत ती पुन्हा सुरू करण्यास परवानगी दिली आहे. या रेस्टॉरंटच्या नव्या तपासणीत खाद्य सुरक्षा नियमांचे 88 टक्के पालन होत असल्याचे आढळून आले. यावेळी न्यायालयाने FDA आयुक्त तुकाराम मुंढे आणि अधिकाऱ्यांच्या कार्यपद्धतीवर तीव्र नाराजी व्यक्त करत अवमान कारवाईचा इशाराही दिला आहे.

कार्यवाह मुख्य न्यायमूर्ती रवींद्र घुगे आणि न्यायमूर्ती गौतम अंखड यांच्या खंडपीठासमोर या प्रकरणाची सुनावणी झाली. MCAने FDAच्या निर्णयाविरोधात उच्च न्यायालयात याचिका दाखल केली होती. स्वच्छतेतील कथित त्रुटी तसेच तृतीय पक्षाकडून रेस्टॉरंट चालविण्याशी संबंधित नियमभंगाच्या कारणावरून FDAने कारवाई केली होती.

FDAच्या भूमिकेवर न्यायालय नाराज

बांद्रा-कुर्ला कॉम्प्लेक्स परिसरातील MCAच्या जागेवर ही पाच रेस्टॉरंट आहेत. गुरुवारी झालेल्या नव्या तपासणीत ती खाद्य सुरक्षा नियमांचे 88 टक्के पालन करत असल्याचे स्पष्ट झाले. मात्र, परवाने MCAच्या नावावर असताना ही रेस्टॉरंट शिर्के इन्फ्रास्ट्रक्चर कडून चालवली जात असल्याचे कारण देत FDAने निलंबन कायम ठेवले होते.

यावर न्यायालयाने FDAने कायद्याचा व्यावहारिक विचार न करता केवळ तांत्रिक दृष्टिकोन स्वीकारल्याचे नमूद केले. अशा प्रकारच्या व्यवस्थेला कायद्यात स्पष्ट बंदीची तरतूद नसल्याचेही खंडपीठाने सांगितले.

‘आदेशाचे पालन केले नाही’

मागील सुनावणीवेळी FDAला व्यावहारिक दृष्टिकोन स्वीकारण्याचे निर्देश दिले होते. तरीही विभागाने त्याचा विचार केला नाही, अशी नाराजी न्यायालयाने व्यक्त केली. संबंधित अधिकाऱ्यांविरोधात अवमान कारवाई करण्याचा इशारा देत न्यायालयाने, “आम्ही अधिकाऱ्यांना वारंवार फटकारून थकलो आहोत. आता कठोर आदेश देण्याची वेळ आली आहे. आम्ही अवमान कारवाई करू,” असे सुनावले.

FDAकडून वारंवार घाईघाईने निर्णय घेतले जात असल्याबद्दलही न्यायालयाने प्रश्न उपस्थित केला. “तुम्ही स्वतःला देव समजता का आणि काहीही करू शकता असे वाटते का?” असा सवाल न्यायालयाने केला.

FDAचा नव्याने सुनावणीचा निर्णय

न्यायालयाच्या नाराजीनंतर अतिरिक्त सरकारी वकील पी. पी. काकडे यांनी FDA निलंबनाचा आदेश मागे घेणार असल्याचे सांगितले. तसेच MCAला शिर्के इन्फ्रास्ट्रक्चर सोबतच्या कराराबाबत नव्याने नोटीस देऊन त्याची बाजू ऐकून घेतल्यानंतर कारणांसह निर्णय घेतला जाईल, असे FDAने स्पष्ट केले.

रेस्टॉरंट आता नियमांचे पालन करत असल्याने निलंबनाचा आदेश उठवण्यात येत असल्याचे न्यायालयाने स्पष्ट केले. त्यानंतर पाचही रेस्टॉरंटना सेवा पुन्हा सुरू करण्याची परवानगी देत न्यायालयाने याचिका निकाली काढल्या. दरम्यान, तृतीय पक्षाकडून रेस्टॉरंट चालविण्याशी संबंधित मुद्द्यांचा FDA स्वतंत्रपणे पुनर्विचार करणार आहे.