Kumar Sanu: बॉलिवूडमधील प्रसिद्ध पार्श्वगायक कुमार सानू यांनी आपल्या कारकिर्दीतील एक धक्कादायक अनुभव नुकताच एका मुलाखतीत सांगितला आहे. १९९० च्या दशकात हिंदी चित्रपटसृष्टीत अंडरवर्ल्डचा मोठा प्रभाव होता. त्या काळात अनेक कलाकारांप्रमाणेच कुमार सानू यांनाही अंडरवर्ल्ड डॉनच्या पार्टीत गाणं गाण्याची वेळ आली होती. त्या प्रसंगाची आठवण त्यांनी नुकत्याच दिलेल्या मुलाखतीत सांगितली.

१९९० च्या दशकात कुमार सानू यांची लोकप्रियता शिखरावर होती. ‘धीरे धीरे से मेरी जिंदगी में आना’, ‘तुझे देखा तो ये जाना सनम’, ‘एक लड़की को देखा तो ऐसा लगा’, ‘दो दिल मिल रहे हैं’ आणि ‘ये काली काली आँखें’ यांसारख्या अनेक सुपरहिट गाण्यांमुळे ते घराघरात पोहोचले होते. त्यांच्या आवाजाचे चाहते केवळ भारतातच नव्हे, तर परदेशातही मोठ्या संख्येने होते. मात्र, या लोकप्रियतेमुळे त्यांचा चाहतावर्ग अंडरवर्ल्डच्या जगातही तयार झाला होता.  (Kumar Sanu)

सुभोजीत घोष यांना दिलेल्या मुलाखतीत कुमार सानू यांनी त्या काळातील परिस्थितीवर भाष्य केले. त्यांनी सांगितले की, त्या काळात बॉलिवूडवर अंडरवर्ल्डचा मोठा प्रभाव होता. अनेक कलाकारांवर दबाव टाकला जात होता आणि त्यामुळे प्रत्येकाच्या मनात भीतीचे वातावरण होते.

या आठवणी सांगताना कुमार सानू म्हणाले, “त्या काळात जीवाची खूप भीती वाटायची. परिस्थितीच तशी होती. अनेक धक्कादायक घटना आमच्या डोळ्यासमोर घडत होत्या. त्यामुळे कलाकार कायम तणावाखाली असायचे.” ( Kumar Sanu)

 

मुलाखतीदरम्यान गुलशन कुमार यांच्या हत्येचाही उल्लेख करण्यात आला. त्या घटनेनंतर चित्रपटसृष्टीतील अनेक कलाकार अधिकच घाबरले होते. अशा घटना पाहिल्यानंतर प्रत्येक जण स्वतःला सुरक्षित ठेवण्याचा प्रयत्न करत होता, असेही त्यांनी सांगितले. ( Kumar Sanu)

कुमार सानू यांनी पुढे सांगितले की, अनेकदा अंडरवर्ल्डशी संबंधित लोकांकडून पार्टी किंवा खासगी कार्यक्रमांमध्ये गाण्यासाठी निमंत्रण यायचे. त्या काळातील परिस्थिती पाहता अनेक कलाकारांना अशा कार्यक्रमांना जाणे टाळणे शक्य नव्हते. त्यामुळे त्यांनाही काही वेळा अशा पार्टींमध्ये गाणी सादर करावी लागली.

ते म्हणाले, “होय, मीही त्यांच्या पार्टीत गाणी गायली आहेत. ते स्वतःला माझे मोठे चाहते असल्याचे सांगायचे. इतकेच नाही, तर ‘कोणी तुम्हाला त्रास दिला तर आम्हाला सांगा, आम्ही बघून घेऊ,’ असेही ते म्हणायचे.”  ( Kumar Sanu)

मात्र, अशा प्रस्तावांना आपण कधीही प्रोत्साहन दिले नाही, असे कुमार सानू यांनी स्पष्ट केले. ते म्हणाले, “मी नेहमी त्यांना नम्रपणे सांगायचो की, माझ्यासाठी काही करण्याची गरज नाही. मी माझं स्वतः सांभाळून घेईन.”

कुमार सानू यांच्या या खुलाशामुळे १९९० च्या दशकातील बॉलिवूडमधील वातावरण पुन्हा एकदा चर्चेत आले आहे. त्या काळात अनेक कलाकारांनी अंडरवर्ल्डच्या दबावाचा सामना केल्याच्या घटना समोर आल्या होत्या. कुमार सानू यांनी सांगितलेला हा अनुभवही त्याच काळातील वास्तव दाखवणारा आहे. आज परिस्थिती मोठ्या प्रमाणात बदलली असली, तरी त्या काळातील अनेक आठवणी कलाकार आजही मुलाखतींमधून सांगताना दिसतात.