Malvan Boat Accident: सिंधुदुर्ग किल्ल्याच्या परिसरात मासेमारी करताना ‘सागरिका’ नावाची नौका अचानक समुद्रात बुडाल्याची दुर्घटना घडली.

या भीषण दुर्घटनेत भाजपाचे मालवण तालुका उपाध्यक्ष तथा नौका मालक सन्मेश सुरेश परब (वय ४९, रा. दांडी, मालवण) आणि त्यांचे खलाशी अक्षय हनुमंत राणे (वय ३०, रा. दांडी, मालवण) या दोघांचा पाण्यात बुडून दुर्दैवी मृत्यू झाला. तर सन्मेश परब यांचा मुलगा सुयोग सन्मेश परब (वय २२) याची सुखरूप सुटका करण्यात आली.

नेमकं काय घडलं? 

मिळालेल्या माहितीनुसार, मालवण येथील दांडी भागातील रहिवासी आणि भाजपचे तालुका उपाध्यक्ष सन्मेश सुरेश परब हे नेहमीप्रमाणे आपला मुलगा सुयोग परब आणि खलाशी अक्षय राणे यांच्यासोबत नौकेतून मासेमारीसाठी गेले होते.

मात्र, सिंधुदुर्ग किल्ल्याच्या नजीक पोहोचताच अचानक नौका खडकावर आदळल्याचा अंदाज आहे. नौका बुडू लागताच तिघांनीही जिवाच्या आकांताने पाण्यात हातपाय मारण्यास सुरुवात केली.

अपघात घडल्याचे लक्षात येताच जवळच मासेमारी करत असलेले जयदेव लोणे यांनी आपल्या नौकेसह मदतीसाठी धाव घेतली. जयदेव लोणे यांच्या नौकेने प्रसंगावधान राखून सुयोग परब याला तातडीने पाण्यातून बाहेर काढले, ज्यामुळे सुयोगचा जीव वाचला.

मात्र दुर्दैवाने सन्मेश परब आणि अक्षय राणे या दोघांना वाचवण्यात यश आले नाही. समुद्राच्या लाटांमुळे सुयोगच्या डोळ्यांदेखतच त्याचे वडील सन्मेश परब आणि खलाशी अक्षय राणे पाण्यात बुडाले.

सन्मेश परब भाजपचे मालवण तालुका उपाध्यक्ष

या दुर्घटनेत मृत्यू झालेले सन्मेश परब हे भाजपचे मालवण तालुका उपाध्यक्ष असल्याची माहिती समोर आली आहे. मासेमारी व्यवसायासोबतच ते राजकीय आणि सामाजिक क्षेत्रातही सक्रिय होते. त्यांच्या दुर्दैवी मृत्यूची बातमी समोर आल्यानंतर दांडी परिसरासह मालवण तालुक्यात हळहळ व्यक्त होत आहे.

दरम्यान, स्थानिक मच्छीमारांच्या मदतीने सन्मेश परब आणि अक्षय राणे या दोघांचेही मृतदेह पाण्यातून बाहेर काढण्यात आले असून ते शवविच्छेदनासाठी रुग्णालयात पाठवण्यात आले आहेत.  मासेमारी नौका नेमकी कोणत्या कारणामुळे बुडाली, याबाबतची सविस्तर माहिती अद्याप समोर आलेली नाही.

हेही वाचा: 

PM Modi on Gold : ‘गरज नसेल तर सोनं खरेदी करू नका, परदेशात फिरण्यासाठी…’ ; पंतप्रधान मोदींचं जनतेला पुन्हा आवाहन