Blast In Kerala: केरळमध्ये एका ख्रिश्चन मेळाव्यात मोठा स्फोट झाला असून त्यात एकाचा मृत्यू झाला असल्याची मोठी बातमी समोर येत आहे. राज्याच्या एर्नाकुलममधील कलामासेरी येथील एका कन्व्हेन्शन सेंटरमध्ये एका सभेदरम्यान मोठा स्फोट झाला असून आतापर्यंत एका व्यक्तीचा जागीच मृत्यू झाला, तर 20 जखमींना रुग्णालयात हलवण्यात आले असल्याचे सांगण्यात येत आहे. दरम्यान, मृतांचा आकडा वाढण्याची शक्यता वर्तवण्यात येत आहे.

सध्या केरळ पोलिसांकडून या स्फोटाबाबत कोणतेही अधिकृत वक्तव्य जारी करण्यात आलेले नाही, मात्र एका अधिकाऱ्याने सांगितले की, सकाळी 9 वाजता स्फोट झाल्यानंतर पोलिसांना मदतीसाठी फोन येऊ लागले. तात्काळ पोलिसांचे पथक घटनास्थळी पोहोचले आणि स्थानिक लोकांसह मदत आणि बचावकार्य सुरू केले. स्फोटानंतर शेकडो लोक पोलिसांच्या मदतीसाठी जमा झाले. याचा एक व्हिडिओ समोर आला आहे ज्यामध्ये लोक जमिनीवर पडलेले दिसत आहेत.

कन्व्हेन्शन सेंटरमधील तीन दिवसीय कार्यक्रमाचा आज शेवटचा दिवस असल्याचे स्थानिकांनी सांगितले. स्फोट झाला तेव्हा सभागृहात दोन हजारांहून अधिक लोक उपस्थित होते. एकापाठोपाठ एक 3-4 स्फोट झाले ज्यात अनेक लोक जखमी झाल्याचा दावा प्रत्यक्षदर्शींनी केला आहे.

या मालिकेतील बॉम्बस्फोटांबाबत केरळ पोलिसांकडून अद्याप कोणतेही अधिकृत वक्तव्य आलेले नाही, मात्र आता केंद्रीय गृहमंत्रालयाने या घटनेची दखल घेतल्याचे सूत्रांनी सांगितले आहे. या स्फोटाची चौकशी राष्ट्रीय तपास यंत्रणा (एनआयए) करणार आहे. एनआयएची फॉरेन्सिक टीम काही वेळात घटनास्थळी पोहोचणार आहे. केरळचे उद्योगमंत्री आणि कलामासरीचे आमदार पी राजीव यांनी या घटनेबाबत सांगितले की, अधिकाऱ्यांना शक्य ती सर्व मदत देण्याच्या सूचना दिल्या आहेत. ते म्हणाले, ‘मी सर्व अधिकाऱ्यांशी बोललो आहे. सर्व सूचना जारी केल्या आहेत. स्फोटाच्या कारणाबाबत अद्याप माहिती मिळालेली नाही. तपास होऊ द्या. सध्या घटनास्थळी कोणालाही जाण्याची परवानगी नाही.