‘यांना’ आवरा…लॉकडाऊनमध्येही रेल्वे तिकिटांचा काळाबाजार

पुणे – रेल्वेचे आरक्षित तिकीट काढण्यासाठी अनेकदा तिकीट एजंट प्रवाशांची फसवणूक करतात . अशा गुन्ह्यांवर रेल्वे सुरक्षा दलाकडून विशेष लक्ष ठेवण्यात येत असून , यावर्षी ऑगस्टपर्यंत आरपीएफने सुमारे 2 हजारांहून अधिक तिकिटे जप्त केली आहेत .

रेल्वेने विना तिकीट प्रवास करणाऱ्या नागरिकांवर रेल्वेकडून तर अवैध तिकीट एजंटांवर रेल्वे सुरक्षा दलाकडून कारवाई करण्यात येते . रेल्वे प्रवास करताना आरक्षित तिकीट असावे , यासाठी नागरिक अनेकदा एजंटांद्वारे तिकीट आरक्षित करतात .

मात्र यामध्ये एजंटांकडून बनावट तिकीट देणे , जास्त पैसे आकारणे , वेबसाइटचा गैरवापर करणे आदी प्रकार घडतात . सध्या केवळ विशेष रेल्वे धावत असताना देखील फसवणुकीचे प्रकार घडल्याचे चित्र असून , याबाबत आरपीएफच्या पुणे विभागाने एजंटांवर कारवाई केली आहे .

सन 2020 मध्ये ऑगस्ट महिन्यापर्यंत आरपीएफ अवैध तिकीट प्रकरणी 54 घटनांमध्ये 72 व्यक्तींवर कारवाई केली आहे . त्यांच्याकडून 56 लाख 61 हजार 534 रुपयांची 2,289 तिकिटे जप्त करण्यात आली आहेत .