Maharashtra Political : सातारा पोलिसांच्या आर्थिक गुन्हे शाखेने मोठी कारवाई करत राज्य सहकार परिषदेचे माजी अध्यक्ष शेखर चरेगावकर यांना अटक केली आहे. कराड येथील यशवंत बँकेत 112 कोटी रुपयांच्या कथित घोटाळ्याप्रकरणी ही कारवाई करण्यात आली. चरेगावकर यांनी राज्यमंत्री दर्जाचे पद भूषवले होते. ते चंद्रकांत पाटील यांचे निकटवर्तीय मानले जातात. त्यामुळे या अटकेमुळे साताऱ्यातील तसेच राज्यातील राजकीय वर्तुळात खळबळ उडाली आहे. पोलिसांनी दिलेल्या माहितीनुसार, आर्थिक गैरव्यवहार आणि निधी अपहाराच्या आरोपांबाबत तपास सुरू होता. प्राथमिक चौकशीनंतर पुराव्यांच्या आधारे अटकेची कारवाई करण्यात आली. संबंधित प्रकरणात आणखी काही जणांच्या भूमिकेचाही तपास सुरू असल्याची माहिती सूत्रांकडून मिळत आहे. दरम्यान, या प्रकरणातील पुढील चौकशीसाठी चरेगावकर यांना न्यायालयात हजर केले जाणार असून पोलिस कोठडीची मागणी केली जाण्याची शक्यता आहे. रिझर्व्ह बँकेचे निर्बंध कायम दरम्यान, यशवंत सहकारी बँक लिमिटेड, फलटणवर रिझर्व्ह बँकेने बँकिंग नियमन कायदा 1949 अंतर्गत निर्बंध लागू केले आहेत. बँकेच्या आर्थिक स्थितीचा विचार करून ठेवीदारांच्या पैसे काढण्यावर मर्यादा घालण्यात आल्या आहेत. आधी लागू केलेल्या निर्देशांचा कालावधी 28 फेब्रुवारी 2026 पर्यंत वाढवण्यात आला होता. आता तो 28 मे 2026 पर्यंत वाढवण्यात आला असून परिस्थितीचे पुनरावलोकन सुरू आहे.