कोलकाता – भारतीय जनता पक्षाच्या आयटी सेलचे प्रमुख अमित मालवीय यांच्यावर राष्ट्रीय स्वयंसेवक संघाच्याच एका कार्यकर्त्याने लैंगिक शोषणाचा आरोप केला आहे. शांतनु सिन्हा असे या संघ कार्यकत्याचे नाव असून त्यांनी सोशल मीडियावरील पोस्टवर तपशीलवारपणे या प्रकाराची वाच्यता केली आहे. कोलकाता येथील पंचतारांकित हॉटेलमध्ये मालवीय यांचे वास्तव्य असते आणि तेथे त्यांना सुंदर बंगाली मुली पुरवल्या जातात. भाजपच्या लोकांकडूनच त्यांना या मुली पुरवल्या जातात. त्याच्या बदल्यात भाजपकडून काही राजकीय लाभ पदरात पाडून घेण्याची इच्छा असलेले लोक हे उद्योग करीत असतात असे सिन्हा यांनी म्हटले आहे. सिन्हा यांनी दोन दिवसांपुर्वी आपल्या एका पोस्ट मध्ये म्हटले होते की, काय अजूनही अमित मालवीय कोलकाता येथील पंचतारांकित हॉटेलात वास्तव्य करून बंगाली मुली पुरवल्या जाण्याची वाट पहात आहेत?. अमित मालवीय यांना सुंदर मुली पुरवून बंगाल प्रदेश भाजपचे अध्यक्षपद पदरात पाडून घेण्यासाठीची भाजप नेत्यांची स्पर्धा अजूनही सुरूच आहे?. सिन्हा यांनी असेही लिहीले आहे की केवळ पंचतारांकित हॉटेलातच नव्हे तर भाजप कार्यालयातही अमित मालवीय यांनी अनेक महिलांचे लैंगिक शोषण केले आहे. दरम्यान कॉंग्रेसच्या प्रवक्त्या सुप्रिया श्रीनेत यांनी पत्रकार परिषद घेत या आरोपांची महिला आयोगाने गंभीर दखल घेऊन त्यांच्यावर कारवाईची मागणी केली आहे.मोदींनी पंतप्रधानपदाची शपथ घेऊन २४ तास उलटत नाहीत तोच भाजप व संघाशी संबंधीत असलेल्या एका बड्या नेत्यावर त्यांच्याच संघटनेच्या एका कार्यकर्त्यांने लैंगिक शोषणाचे थेट आरोप केले आहेत ही गंभीर बाब आहे.
