​विंझर : ​आगामी जिल्हा परिषद आणि पंचायत समिती निवडणुकांच्या पार्श्वभूमीवर राजगड (वेल्हे) तालुक्यात भारतीय जनता पक्षाकडून उमेदवारीसाठी चुरस होणार आहे. तालुक्यात एकूण सहा जागांसाठी २६ प्रस्थापित, मातब्बर इच्छुक उमेदवारांनी दावेदारी पक्षाकडे सादर केली आहे. आजी – माजी पदाधिकारी, अनुभवी सरपंच-उपसरपंच, युवा नेते, महिला पदाधिकारी कार्यकर्त्यांच्या या मोठ्या समावेशामुळे राजगड तालुक्यात सत्ता काबीज करण्यासाठी भाजपने कंबर कसली आहे.

​भाजपचे राजगड तालुकाध्यक्ष राजू प्रभाकर रेणुसे यांनी माजी आमदार संग्राम थोपटे यांच्या नेतृत्वाखाली ही उमेदवारांची यादी जाहीर केली आहे, ज्यामुळे पक्षाचे संघटन आणि तयारी स्पष्ट होते. यादीत विविध क्षेत्रांतील जाणकार आणि प्रभावी चेहऱ्यांचा समावेश आहे.
मार्गासनी- वेल्हे बुद्रुक जिल्हा परिषद गटात ४ जण इच्छुक आहेत. नवीन चेहरेही स्पर्धेत आहेत.

​विंझर – पानशेत जिल्हा परिषद गटात ५ जण इच्छुक आहेत. हा गट प्रतिष्ठेचा बनला असून, प्रबळ दावेदार रिंगणात उतरणार आहेत. पंचायत समिती गणांमध्ये महिला आणि युवा नेतृत्वाचा दबदबा दिसून येत आहे. ​पंचायत समितीच्या चारही गणांमध्ये भाजपकडून उमेदवारीसाठी मोठी स्पर्धा असून, महिला नेतृत्वाला पक्षाने दिलेले महत्त्व दिसून येत आहे.

मार्गासनी- विंझर गटात चुरस
मार्गासनी – वेल्हे बुद्रुक गटात इच्छुक उमेदवारांची यादी- दिनकर धरपाळे (माजी जिल्हा परिषद सदस्य), दिनकर सरपाले (माजी सभापती), आकाश वाडघरे (माजी सभापती सविता आकाश वाडघरे यांचे पती), शिवाजी चोरघे (वांगणी उपसरपंच). विंझर – पानशेत जिल्हा परिषद गटात सुनील जागडे (भाजपा पुणे जिल्हा उपाध्यक्ष), विष्णू राऊत (पंचायत समिती माजी सदस्य), हनुमंत शिंदे (राष्ट्रीय अध्यक्ष गुरव समाज), शिवराज शेंडकर (चंद्रकांत शेंडकर उपसभापती यांचा मुलगा), देविदास हनमघर (सरपंच साईव बुद्रुक)

प्रस्थापित नेत्यांची कसोटी

पंचायत समिती गणातून इच्छुक उमेदवार- विंझर गण- राजू प्रभाकर रेणुसे (भाजपा वेल्हे तालुकाध्यक्ष), गणेश जागडे (माजी उपसरपंच आंबेड), सचिन बधे (तालुका कोषाध्यक्ष), सुभाष रानवडे (माजी सरपंच रुळे), सतीश लिम्हण (माजी सरपंच, विंझर). मार्गासनी गण- विशाल वालगुडे (माजी सरपंच मार्गासनी), रवींद्र दसवडकर (माजी भाजपा तालुकाध्यक्ष), प्रकाश बढे (माजी सरपंच सोंडे सरपाले), राहुल रणखांबे (भाजपा अनुसूचित जाती आघाडी तालुकाध्यक्ष).

दोन गणांत घराणेशाही येणार?

पंचायत समिती पानशेत गण- प्रमिला अमोल पडवळ (शिरकोली सरपंच यांच्या पत्नी), भाग्यश्री रमेश मरगळे (सरपंच रमेश मरगळे यांच्या पत्नी), प्रतीक्षा हर्षल हनमघर (देविदास हनमघर साईव बुद्रुक सरपंच यांची सून), सीमा विष्णू राऊत (माजी सभापती) हे दावेदार आहेत.
वेल्हे बुद्रुक गणात निकिता निलेश पवार (भाजपा युवा मोर्चा तालुकाध्यक्ष यांच्या पत्नी), गौरी सचिन भरम (माजी भाजपा महिला अध्यक्ष),
विद्या शुभम बेलदरे (युवा मोर्चा जिल्हा चिटणीस यांच्या पत्नी), भारती संदीप नगिने (चतुरा नगीने माजी सभापती यांच्या सून) हे उमेदवारीच्या शर्यतीत आहेत. त्यामुळे या दोन गणांत कोण बाजी मारणार, याकडे भोर मतदारसंघाचे लक्ष वेधले आहे.

प्रबळ उमेदवारीचा निकष

​एकाच वेळी २६ जाणकार आणि प्रभावी उमेदवारांची दावेदारी भाजपकडे आल्यामुळे वेल्ह्यात पक्षाची ताकद आणि विस्तार स्पष्टपणे दिसून आहे. उमेदवाराची विजय होण्याची क्षमता, पक्षनिष्ठा, सामाजिक समीकरण या त्रिसूत्रीवर भर दिला जाईल, असे पक्षसूत्रांनी सांगितले.

या सर्व इच्छुकांमधून पक्षाकडून कोणाला तिकीट मिळेल, याबद्दल तालुक्यात जोरदार चर्चा सुरू आहे. भाजपकडून इच्छुकांनी मोठी गर्दी आहे. लवकरच पक्षश्रेष्ठींच्या बैठकीत माजी आमदार संग्राम थोपटे व भाजपा जिल्हाध्यक्ष शेखर ओढणे, जिल्हा सरचिटणीस बाळासाहेब गरुड, राजगड तालुकाध्यक्ष राजू प्रभाकर रेणुसे यांच्या नेतृत्वात अंतिम निर्णय होणार असून, उमेदवारी कोणाला मिळणार, याकडे वेल्हे तालुक्याचे लक्ष लागून राहिले आहे.