पाटणा : बिहारमध्ये काँग्रेस नेते आणि विरोधी पक्षनेते राहुल गांधी यांच्या वोट अधिकार यात्रेदरम्यान पाटण्यातील काँग्रेसच्या राज्य कार्यालयावर, सदाकत आश्रमावर, भाजप कार्यकर्त्यांनी हल्ला केल्याची गंभीर घटना घडली. काँग्रेसच्या एका सभेत पंतप्रधान नरेंद्र मोदी यांच्या दिवंगत आईबद्दल अपमानास्पद टिप्पणी केल्याच्या वादातून हा राडा उद्भवल्याचे सांगितले जात आहे. या हल्ल्यात काँग्रेस कार्यालयाच्या आवारातील वाहनांची तोडफोड झाली आणि पक्षाचे पोस्टर्स फाडण्यात आले.

शुक्रवारी पाटण्यातील सदाकत आश्रम येथे भाजप कार्यकर्त्यांनी आक्रमक पवित्रा घेत काँग्रेसविरोधी घोषणाबाजी सुरू केली. त्यानंतर त्यांनी कार्यालयावर दगडफेक केली आणि गेट तोडून आत प्रवेश केला. प्रत्यक्षदर्शींच्या माहितीनुसार, हल्लेखोरांनी कार्यालय परिसरातील ट्रकच्या काचा फोडल्या, काँग्रेसचा झेंडा फाडला आणि वोट अधिकार यात्रेचे पोस्टर्स फाडून टाकले. या घटनेने परिसरात तणाव निर्माण झाला.

या हल्ल्याला प्रत्युत्तर देण्यासाठी काँग्रेस कार्यकर्त्यांनीही घोषणाबाजी केली, ज्यामुळे दोन्ही पक्षांमधील संघर्ष अधिक तीव्र झाला. माहिती मिळताच पोलिसांनी घटनास्थळी धाव घेत परिस्थिती नियंत्रणात आणण्याचा प्रयत्न केला. दरम्यान, पंतप्रधान मोदी आणि त्यांच्या आईबद्दल कथित अपमानास्पद टिप्पणीच्या मुद्द्यावरून एनडीए नेते, तसेच बिहारचे मुख्यमंत्री नितीश कुमार यांनी काँग्रेस आणि राहुल गांधींवर टीका केली आहे. या प्रकरणामुळे बिहारमधील राजकीय वातावरण तापले असून, काँग्रेसने या हल्ल्यामागे भाजपचा हात असल्याचा आरोप केला आहे.