पाटणा : बिहारचे मुख्यमंत्री नीतीश कुमार यांनी पुन्हा एकदा आपल्या अनपेक्षित वर्तनाने सर्वांना आश्चर्यचकित केले आहे. पाटण्यातील कृषी भवनात आयोजित नियुक्तीपत्र वितरण समारंभात त्यांनी एका वरिष्ठ अधिकाऱ्याच्या डोक्यावर फुलदाणी ठेवली. हा व्हिडिओ सोशल मीडियावर व्हायरल झाला असून, यावरून नीतीश कुमार यांची खिल्ली उडवली जात आहे.

मंचावर नेमके काय घडले?
कार्यक्रमादरम्यान बिहार सरकारचे कॅबिनेट अपर मुख्य सचिव एस. सिद्धार्थ यांनी परंपरेनुसार नीतीश कुमार यांचे स्वागत करण्यासाठी एक फुलदाणी (रोपासह) आणली. नीतीश यांनी ती फुलदाणी हातात घेतली आणि कोणताही विचार न करता थेट सिद्धार्थ यांच्या डोक्यावर ठेवली. सिद्धार्थ यांनी तात्काळ ती काढून दुसऱ्या अधिकाऱ्याकडे दिली, परंतु तोपर्यंत हा क्षण कॅमेऱ्यात कैद झाला होता. हा व्हिडिओ सोशल मीडियावर वेगाने पसरला आणि लोकांनी यावर विविध प्रतिक्रिया व्यक्त केल्या.

सोशल मीडियावर संमिश्र प्रतिक्रिया –
सोशल मीडियावर नीतीश कुमार यांच्या या कृतीवरून जोरदार चर्चा सुरू आहे. लालू प्रसाद यादव यांच्या कन्या रोहिणी आचार्य यांनी हा व्हिडिओ शेअर करत लिहिले, “मेंदूवर विक्षिप्तपणाचा हल्ला झाला आहे, चाचा आपल्या अधिकाऱ्याच्या डोक्यावर फुलदाणी ठेवत आहेत.”

दिमाग पर हो चुका विक्षिप्तपन का हमला
चाचा रख दे रहे हैं अपने अधिकारी के माथे पर गमला😂 pic.twitter.com/bTDqQaOylF

— Rohini Acharya (@RohiniAcharya2) May 26, 2025

३१५ प्रखंड उद्यान अधिकाऱ्यांना नियुक्तीपत्र –
या समारंभात नीतीश कुमार यांनी १९ मे २०२५ रोजी बिहार लोकसेवा आयोगामार्फत निवड झालेल्या ३१५ प्रखंड उद्यान अधिकाऱ्यांना नियुक्तीपत्रे वितरित केली, यामध्ये १५० महिलांचा समावेश आहे. याशिवाय, शेतकऱ्यांसाठी ‘बिहार कृषी’ मोबाइल ॲप लाँच करण्यात आले, ज्यामध्ये योजनांची माहिती, डिजिटल पासबुक, हवामान अंदाज आणि बाजारभाव यासारख्या सुविधा उपलब्ध आहेत. तसेच, खरीप महाभियान २०२५ ची सुरुवात २३ शेतकरी जागरूकता वाहनांना हिरवी झेंडी दाखवून करण्यात आली.

या विचित्र घटनेमुळे नीतीश कुमार यांच्या वर्तनावर प्रश्नचिन्ह उपस्थित झाले असून, सोशल मीडियावर याबाबत तीव्र प्रतिक्रिया उमटत आहेत.