Kalki 2 | २०२४ मध्ये ‘कल्की 2898 एडी या चित्रपटाने बॅाक्स अॅाफिसवर चांगले यश मिळाले. या चित्रपटाच्या सिक्वलची चाहते आतुरतेने वाट पाहत होते. नाग अश्विन दिग्दर्शित या चित्रपटात अमिताभ बच्चन, प्रभास आणि दीपिका यांच्या प्रमुख भूमिका होत्या. या चित्रपटाच्या सिक्वलबाबात एक अपडेट समोर आली आहे. 123 तेलुगूमधील वृत्तानुसार, या चित्रपटाचे दिग्दर्शक नाग अश्विन यांनी शनिवारी तिरुमला येथील तिरुपती देवसंस्थान मंदिराल भेट देत बालाजीचे दर्शन घेतले. यानंतर त्यांनी मीडियाशी संवाद साधला. यावेळी त्यांनी त्यांच्या आगामी ‘कल्की 2’ चित्रपटाविषयी भाष्य केले. ‘कल्की 2’ चित्रपटाच्या स्क्रिप्टवर काम जोरात सुरू आहे आणि या वर्षाच्या अखेरीस या चित्रपटाच्या शूटिंगला सुरुवात होईल, अशी माहिती त्यांनी दिली. तसेच ‘कल्की 2’ मध्ये कर्णाच्या भूमिकेवर अधिक लक्ष केंद्रित करण्यात येणार असल्याचे अश्विन यांनी स्पष्ट केले. यामुळे चित्रपटाबद्दल मोठी उत्सुकता प्रेक्षकांमध्ये निर्माण झाली आहे. या चित्रपटाची कथा कर्ण आणि अश्वत्थामाभोवती फिरणार असल्याचा खुलासाही त्यांनी केला आहे. २०२४ मध्ये प्रदर्शित झालेल्या कल्की 2898 एडी या चित्रपटाचे दिग्दर्शन नाग अश्विन यांनी केले होते. वैजयंती मूव्हीज यांनी चित्रपटाची निर्मिती केली. हा चित्रपट भारतातील सर्वात महागडा चित्रपट होता, ज्याने जगभरातून 1180 कोटींहून अधिक बॅाक्स अॅाफिस कलेक्शन केले. अश्विनी दत्त निर्मित या चित्रपटाला संतोष नारायणन यांनी संगीत दिले आहे. या चित्रपटाच्या पहिल्या भागात अमिताभ बच्चन, दीपिका पदुकोण, दिशा पटानी आणि इतर अनेक कलाकारांनी देखील महत्त्वपूर्ण भूमिका साकारल्या होत्या.
