Union Cabinet Reshuffle 2026 : केंद्रातील संभाव्य मंत्रिमंडळ विस्ताराच्या पार्श्वभूमीवर उपमुख्यमंत्री एकनाथ शिंदे यांच्या शिवसेनेला मोठे राजकीय बळ मिळण्याची शक्यता व्यक्त केली जात आहे. पक्षातील सूत्रांच्या माहितीनुसार, शिवसेनेला एक कॅबिनेट मंत्रीपद आणि एक राज्यमंत्रीपद मिळण्याची शक्यता असून, कॅबिनेट मंत्रीपदासाठी कल्याणचे खासदार डॉ. श्रीकांत शिंदे यांचे नाव आघाडीवर असल्याची चर्चा आहे. संभाव्य केंद्रीय मंत्रिमंडळाचा विस्तार जुलै महिन्यात होणार असल्याची माहिती आहे. मात्र, याबाबत अधिकृत कोणतीही माहिती समोर आलेली नाही.

‘ऑपरेशन टायगर’नंतर शिवसेनेच्या खासदारांची संख्या वाढून १३ वर पोहोचली आहे. त्यामुळे महाराष्ट्रातील सर्वाधिक खासदार असलेला पक्ष म्हणून शिवसेनेचे केंद्रातील राजकीय वजन वाढले असून, त्याचा लाभ मंत्रिमंडळ विस्तारात मिळण्याची शक्यता वर्तवली जात आहे. संभाव्य मंत्रिमंडळ विस्तारात शिवसेनेतील दोन खासदारांना संधी मिळणार असल्याची चर्चा सुरू आहे. यामध्ये आता एक अशी माहिती सूत्रांनी दिली आहे. या माहितीत सध्याचे शिवसेनेचे मंत्री प्रतापराव जाधव यांच्याकडून राज्यमंत्री पदाचा कार्यभार काढून तो खासदार संजय जाधव यांना मिळू शकतो.  (Union Cabinet Reshuffle 2026)

हेही वाचा : Pune District : रात्रीच्या अंधारात चोरट्यांचा कहर! बेट भागातील ट्रान्सफॉर्मर आणि केबल चोरीच्या घटनांमध्ये लक्षणीय वाढ

सूत्रांच्या माहितीनुसार, प्रतापराव जाधव यांच्या कामकाजाबाबत केंद्रात नाराजी असल्याची चर्चा आहे. त्यामुळे संभाव्य मंत्रिमंडळ विस्तारात त्यांचे मंत्रीपद कायम राहणार की त्यांना डच्चू मिळणार, याकडे राजकीय वर्तुळाचे लक्ष लागले आहे. दरम्यान, कॅबिनेट मंत्रीपदासाठी डॉ. श्रीकांत शिंदे यांच्या नावाला भाजपच्या केंद्रीय नेतृत्वाचीही पसंती असल्याचे सूत्रांचे म्हणणे आहे. त्यामुळे त्यांच्या नावावर जवळपास शिक्कामोर्तब झाल्याची चर्चा राजकीय वर्तुळात रंगली आहे.

याचदरम्यान, श्रीकांत शिंदे आणि धाराशिवचे खासदार ओमराजे निंबाळकर यांनी तिरुपती बालाजीचे दर्शन घेतले. दोघांनीही सुमारे चार किलोमीटर पायी चालत दर्शन घेतल्याने त्यांच्या नावांची राजकीय चर्चाही अधिक रंगली आहे. ओमराजेंनीदेखील मंत्रीपदाची लॅाटरी लागू शकतो असे बोलले जात आहे. त्यामुळे केंद्रीय स्तरावर काय निर्णय घेतला जाणार हे पाहणे महत्वाचे असणार आहे. केंद्रीय मंत्रिमंडळ विस्ताराबाबत किंवा संभाव्य मंत्रिपदांबाबत अद्याप कोणतीही अधिकृत घोषणा झालेली नाही. सध्या ही माहिती पक्षातील सूत्रांच्या आधारे समोर आली असून अंतिम निर्णय केंद्र सरकारकडून जाहीर होणे बाकी आहे.

संजय जाधव यांचं नाव आघाडीवर   (Union Cabinet Reshuffle 2026)

 

राज्यमंत्रीपदासाठी केंद्रीय आयुष राज्यमंत्री प्रतापराव जाधव यांच्या जागी परभणीचे खासदार संजय उर्फ बंडू जाधव यांच्या नावाची चर्चा सुरू आहे. सलग तिसऱ्यांदा खासदार म्हणून निवडून आलेल्या संजय जाधव यांच्या माध्यमातून मराठवाड्यात पक्षसंघटना अधिक मजबूत करण्याचा पक्षाचा प्रयत्न असल्याचे सांगितले जात आहे.

हेही वाचा :  Health Tips: जेवणानंतर लगेच चहा पिता? ही सवय आरोग्यासाठी ठरू शकते धोकादायक; तज्ज्ञांनी सांगितले कारण