Parth Pawar met Sharad Pawar : एकीकडे केंद्रीय मंत्रिमंडळाचा विस्तार होणार असल्याचे सातत्याने सांगितले जात आहे. तर दुसरीकडे राज्यात देखील पडद्यामागे राजकीय घडामोडी घडत आहेत. अशीच घडामोड काल रात्री घडली आहे. महाराष्ट्राच्या राजकारणातील ज्येष्ठ नेते शरद पवार यांची मुंबईतील सिल्वर ओक या निवासस्थानी जाऊन राष्ट्रवादी काँग्रेस पक्षाचे खासदार पार्थ पवार यांनी भेट घेतली.

रात्री उशिरा झालेल्या आजोबा आणि नातू यांच्या भेटीमुळे राजकीय वर्तुळात विविध चर्चांना उधाण आले आहे. दोघांमध्ये तीन तास राज्यातील विविध विषयांसह इतर विषयांसंदर्भात चर्चा झाल्याची माहिती सूत्रांकडून मिळत असून या वृत्ताला अधिकृत दुजोरा मिळालेला नाही.

भेटीची टाईमलाईन

शरद पवार आणि पार्थ पवार यांच्यात सिल्व्हर ओकवर तीन तास बैठक झाली. काल रात्री ८ वाजून १५ मिनिटांनी पार्थ पवार सिल्व्हर ओकवर आले होते. त्यानंतर दोघांमध्ये बैठक झाली आणि यानंतर पार्थ पवार साधारण रात्री ११ वाजून १५ मिनिटांनी सिल्वर ओकवरुन बाहेर पडले. या भेटीचे नेमके कारण अद्याप समोर आलेले नाही.

मंत्रीपदाबाबतच्या चर्चेची शक्यता नाकारता येत नाही

दरम्यान, केंद्रातील मंत्रिमंडळ विस्ताराच्या पार्श्वभूमीवर हालचालींना वेग आला असून, अजित पवार यांच्या राष्ट्रवादीला एक मंत्रीपद मिळणार असल्याचे बोलले जात आहे. अनेक नावांची मंत्रीपदासाठी चर्चा होत असली तरी पार्थ पवार यांचे नाव आघाडीवर असल्याचे सांगण्यात आले आहे. या मुद्यावर बैठकीत चर्चा झाल्याची शक्यता नाकारता येत नाही. या भेटीत बारामतीतील काही विकास कामांवरही चर्चा झाल्याचे सांगण्यात येत आहे.

१५ दिवसांपूर्वी दिल्लीत खासदार सुप्रिया सुळे यांची कन्या रेवती सुळे यांच्या रिसेप्शनचे आयोजन करण्यात आले होते. या कार्यक्रमाला पंतप्रधान नरेंद्र मोदी, गृहमंत्री अमित शाह, विरोधी पक्षनेते राहुल गांधी यांच्यासह अनेक क्षेत्रातील मान्यवरांनी हजेरी लावली होती. त्यानंतर  शरद पवार आणि पार्थ पवार यांच्यात झालेल्या भेटीला विशेष महत्व प्राप्त झाले आहे.

Pune Crime News: रक्ताचे डाग धुवून कॅफे पुन्हा सुरू; पुरावा नष्ट केल्याप्रकरणी मालकासह दोघांना अटक