मुँबई – आगामी शैक्षणिक वर्ष 2025-26 पासून राज्यातील शाळांमध्ये केंद्रीय माध्यमिक शिक्षण मंडळाचा (CBSE) अभ्यासक्रम पॅटर्न लागू करण्यात येणार असल्याची घोषणा शालेय शिक्षण मंत्री दादा भुसे यांनी आज विधान परिषदेत केली. विद्यार्थ्यांची शैक्षणिक गुणवत्ता वाढावी आणि त्यांना राष्ट्रीय पातळीवर स्पर्धात्मक बनवण्यासाठी राज्य सरकारने हा निर्णय घेतला असल्याचे त्यांनी सांगितले. शालेय शिक्षण विभागाशी संलग्न सुकाणू समितीने राज्य अभ्यासक्रमाच्या नव्या आराखड्यास मान्यता दिली असून, याबाबतची माहिती दादा भुसे यांनी विधान परिषदेत एका प्रश्नाला लेखी उत्तर देताना दिली. यावर्षी फक्त पहिलीच्या वर्गासाठी हा अभ्यासक्रम असेल. पुढील वर्षी दुसरी असा टप्प्या टप्प्याने अभ्यासक्रम लागू केला जाईल.

भारतीय जनता पक्षाचे आमदार प्रसाद लाड यांनी या संदर्भात प्रश्न उपस्थित केला होता. त्यांच्या प्रश्नाला उत्तर देताना मंत्री भुसे म्हणाले की, राष्ट्रीय शैक्षणिक धोरण 2020 नुसार, राज्यातील इयत्ता तिसरी ते बारावीच्या शाळांसाठी CBSE अभ्यासक्रमाच्या आराखड्यास सुकाणू समितीने मान्यता दिली आहे. याअंतर्गत पाठ्यपुस्तके मराठी भाषेत उपलब्ध करून दिली जाणार असून, नवीन शैक्षणिक सत्र 1 एप्रिल 2025 पासून सुरू होणार आहे. गेल्या दोन महिन्यांपासून सुरू असलेल्या या विषयावरील चर्चांना यामुळे पूर्णविराम मिळाला आहे.

राष्ट्रीय शिक्षण धोरण 2020 च्या प्रभावी अंमलबजावणीसाठी स्थापन करण्यात आलेल्या सुकाणू समितीची नुकतीच बैठक महाराष्ट्र प्राथमिक शिक्षण परिषद, मुंबई येथे झाली. या बैठकीत शिक्षणाचा दर्जा उंचावण्यासाठी महत्त्वाचे निर्णय घेण्यात आले. शिक्षण क्षेत्रातील आव्हाने, भविष्यातील दिशा आणि धोरणाच्या यशस्वी अंमलबजावणीवर सविस्तर चर्चा झाली. शिक्षणतज्ज्ञ, प्रशासकीय अधिकारी आणि शिक्षण क्षेत्रातील मान्यवरांनी या प्रक्रियेत मोलाचे योगदान दिले. ही बैठक राज्यातील शालेय शिक्षणाला समृद्ध करण्यासाठी एक महत्त्वाचे पाऊल ठरली असून, राष्ट्रीय शिक्षण धोरणाच्या उद्दिष्टांना गती देणारी असल्याचे दादा भुसे यांनी नमूद केले.