Eknath Shinde : मोठी बातमी! एकनाथ शिंदे तातडीने दिल्लीला रवाना; पडद्यामागे राजकीय हालचालींना वेग
Eknath Shinde : यापूर्वी मुख्यमंत्री देवेंद्र फडणवीस यांनीही दिल्ली दौरा करून केंद्रीय गृहमंत्री अमित शाह यांची भेट घेतली होती. त्यानंतर आता शिंदे दिल्लीत भाजपच्या वरिष्ठ नेत्यांसोबत चर्चा करणार असल्याची माहिती समोर येत आहे.
Eknath Shinde : उपमुख्यमंत्री एकनाथ शिंदे आज दिल्ली दौऱ्यावर असून, त्यांच्या या दौऱ्याकडे राज्याच्या राजकीय वर्तुळाचे लक्ष लागले आहे. काही दिवसांपूर्वी ज्येष्ठ नेते आणि राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्यासोबत झालेल्या भेटीनंतर आता शिंदे थेट दिल्लीत दाखल होत आहेत. विशेष म्हणजे, केंद्रीय मंत्रिमंडळ विस्ताराच्या चर्चांना वेग आलेला असताना हा दौरा होत असल्याने त्याला अधिक महत्त्व प्राप्त झाले आहे.
यापूर्वी मुख्यमंत्री देवेंद्र फडणवीस यांनीही दिल्ली दौरा करून केंद्रीय गृहमंत्री अमित शाह यांची भेट घेतली होती. त्यानंतर आता शिंदे दिल्लीत भाजपच्या वरिष्ठ नेत्यांसोबत चर्चा करणार असल्याची माहिती समोर येत आहे. त्यामुळे आगामी मंत्रिमंडळ विस्तार आणि महाराष्ट्रातील राजकीय समीकरणांबाबत विविध तर्कवितर्कांना उधाण आले आहे.
दरम्यान, ‘ऑपरेशन टायगर’नंतरचा हा एकनाथ शिंदे यांचा पहिलाच दिल्ली दौरा आहे. या मोहिमेअंतर्गत शिवसेना (उद्धव बाळासाहेब ठाकरे) गटातील सहा खासदारांनी शिंदे गटात प्रवेश केला. या घडामोडीनंतर शिंदे गटाचे राजकीय वजन वाढल्याचे मानले जात आहे. या सहा खासदारांपैकी दोन जणांना केंद्रीय मंत्रिमंडळात स्थान मिळू शकते, अशी चर्चा राजकीय वर्तुळात सुरू आहे. तसेच खासदार श्रीकांत शिंदे यांचाही केंद्रीय मंत्रिमंडळात मंत्री पदाचा विचार केला जात असल्याचे बोलले जात आहे.
लवकरच केंद्रीय मंत्रिमंडळाचा विस्तार होणार असून, या विस्तारात काही नव्या चेहऱ्यांना संधी मिळण्याबरोबरच काही विद्यमान मंत्र्यांच्या कामगिरीचाही आढावा घेतला जाणार असल्याचे बोलले जात आहे. तर काही मंत्र्यांना डिच्चू दिला जाणार असल्याचे सांगितले जात आहे. अशा परिस्थितीत महाराष्ट्रातील प्रतिनिधित्वाबाबतही मोठे निर्णय होण्याची शक्यता आहे.
Eknath Shinde
राजकीय चर्चांनुसार, धाराशिवचे खासदार ओमराजे निंबाळकर आणि परभणीचे खासदार संजय ऊर्फ बंडू जाधव यांची नावे संभाव्य केंद्रीय मंत्रिपदासाठी चर्चेत आहेत. मात्र, याबाबत अद्याप कोणतीही अधिकृत घोषणा करण्यात आलेली नाही. एकनाथ शिंदे यांच्या दिल्ली दौऱ्यातून कोणते नवे संकेत मिळतात, याकडे राज्याच्या राजकीय वर्तुळाचे लक्ष लागले आहे.
अशीही चर्चा…
दुसरीकडे, मुख्यमंत्री देवेंद्र फडणवीस यांना केंद्रात महत्त्वाची जबाबदारी मिळू शकते, अशीही चर्चा रंगत आहे. त्याचबरोबर महाराष्ट्रात पुन्हा एकदा एकनाथ शिंदे मुख्यमंत्रीपदाची धुरा सांभाळू शकतात. मात्र, या चर्चांना अधिकृत दुजारो मिळाला नसून केवळ चर्चाच असल्याचे महायुतीच्या नेत्यांकडून सांगण्यात येत आहे.
