सहारनपूर – उत्तर प्रदेशातील सहारनपूरमधील देवबंद भागात भीम आर्मी प्रमुख चंद्रशेखर आझाद यांच्यावर प्राणघातक हल्ला झाला. हरियाणाची नंबर प्लेट असलेल्या कारमधून आलेल्या हल्लेखोरांनी चंद्रशेखर यांच्यावर 4 राऊंड फायर केले. त्यातील एक गोळी त्यांच्या पोटाला स्पर्श करून गेली. गोळीबारात कारच्या काचाही फुटल्याचे प्रथमदर्शनी दिसत आहे.

चंद्रशेखर यांना रुग्णालयात नेण्यात आले आहे. दरम्यान, रुग्णालयाबाहेर समर्थकांची गर्दी होती. या घटनेनंतर पोलिसांनी घटनास्थळी पोहचत परिसराची नाकेबंदी केली आहे. तसेच हल्लेखोरांना अटक करण्यासाठी पोलिसांनी प्रयत्न सुरू केले आहेत.

चंद्रशेखर हे भीम आर्मीचे सह-संस्थापक आणि अध्यक्ष आहेत. ते आंबेडकरवादी कार्यकर्ते आणि वकील आहेत. आझाद, सतीश कुमार आणि विनय रतन सिंह यांनी 2014 मध्ये भीम आर्मीची स्थापना केली. ही संघटना शिक्षणाच्या माध्यमातून भारतातील दलित हिंदूंसाठी काम करते. पश्‍चिम उत्तर प्रदेशात दलितांसाठी मोफत शाळाही ते चालवतात.

या हल्ल्यानंतर चंद्रशेखर यांचा राजकीय पक्ष आझाद समाज पार्टीने ट्‌विट करून हल्ल्‌याची माहिती देताना, आरोपींना तत्काळ अटक करावी व चंद्रशेखर आझाद यांना संरक्षण द्यावे अशी मागणी केली आहे.