नवी दिल्ली  – भाजपचे विद्यमान अध्यक्ष डाॅ. जगत प्रकाश अर्थात जेपी नड्डा यांना लोकसभा निवडणुकीपर्यंत जूनपर्यंत सेवा मुदतवाढ देण्यात आली आहे. आता लोकसभा निवडणूक संपल्याने त्यांना पदावरून हटवण्याची चर्चा सुरू झाली आहे. नवे सरकार स्थापन झाल्यानंतरच त्यांना पदावरून हटवले जाईल, अशी चर्चा आहे. त्यांना केंद्र सरकारमध्ये आणून एखाद्या खात्याची मोठी जबाबदारी दिली जाऊ शकते.

भाजपचे राष्ट्रीय अध्यक्ष होण्यापूर्वी नड्डा यांनी मोदी सरकारमध्ये आरोग्य मंत्रीपद भूषवले होते. आता त्यांच्याकडे पुन्हा एकदा आरोग्य मंत्रिपद किंवा अशीच मोठी जबाबदारी दिली जाऊ शकते. त्याचवेळी मनसुख मांडविया यांना गुजरातमध्ये मोठे पद दिले जाण्याची शक्यता आहे. गुजरातच्या मुख्यमंत्रिपदात काही फेरफार झाल्यास भाजपच्या सर्वोच्च नेतृत्वाचा विश्वास असलेले मनसुख मांडविया हे त्याचे मोठे दावेदार ठरू शकतात.

नड्डा यांना अध्यक्षपद सोडावे लागण्याची शक्यता असतानाच पक्षाच्या पुढील अध्यक्षांच्या नावाचा विचारही जोर धरत आहे. मध्य प्रदेशात ‘मामा’ म्हणून ओळखले जाणारे माजी मुख्यमंत्री शिवराज सिंह चौहान यांची पक्षाच्या नव्या अध्यक्षपदी नियुक्ती केली जाऊ शकते का, याची चाचपणी सुरु झाली आहे. अत्यंत सौम्य स्वभावाचे शिवराजसिंह चौहान यांना मध्य प्रदेशच्या मुख्यमंत्रीपदावरून हटवल्याबद्दल तीव्र प्रतिक्रिया उमटल्या होत्या, मात्र त्यानंतरही शिवराजसिंह चौहान यांनी पक्षासाठी अथक परिश्रम करून सर्व २९ जागा जिंकून मोदी सरकार मजबूत केले.

मध्य प्रदेशात भाजपाला धक्का बसला असता, तर सध्या भाजपचे सरकार स्थापन करण्यात अडचणी आल्या असत्या, हे स्पष्ट आहे. मुख्यमंत्रिपदावरून हटल्यानंतरही भाजपसाठी सातत्याने प्रामाणिकपणे काम केल्याचा मोठा पुरस्कार चौहान यांना मिळू शकतो, असे मानले जात आहे. पक्षाच्या सदस्यत्व मोहिमेतही लक्षणीय यश मिळवून त्यांनी आपली संघटनात्मक क्षमता दाखवून दिली.

भाजपच्या सूत्रांनी दिलेल्या माहितीनुसार, यावेळी पक्षात मोठे फेरबदल होऊ शकतात. यामध्ये पक्षाच्या अध्यक्षपदाच्या बदलासोबतच अनेक राज्यांमध्ये अध्यक्षपदातही बदल होण्याची शक्यता आहे. हरियाणा, झारखंड, दिल्ली आणि महाराष्ट्रातील आगामी विधानसभा निवडणुका पाहता मोठा बदल होऊ शकतो.

नव्या मोदी सरकारमध्ये एनडीएच्या मित्रपक्षांचा दावा अधिक भक्कम होण्याची शक्यता असल्याने त्याचा थेट परिणाम सरकारमधील भाजपच्या वरिष्ठ नेत्यांच्या भूमिकेवर होऊ शकतो. अनेक बड्या नेत्यांना सरकारमधून संघटनेत पाठवता येईल आणि काहींना सरकारमध्ये आणता येईल.

एनडीएचा सर्वात मोठा मित्रपक्ष म्हणून उदयास आलेल्या टीडीपीने रस्ते वाहतूक मंत्रालयाची केलेली मागणीही भाजपच्या अंतर्गत राजकारणाशी जोडली जात आहे. नितीन गडकरींना महाराष्ट्र राज्यात मोठी जबाबदारी देण्याच्या विचारातून टीडीपीकडून अशी मागणी करण्यात आल्याचे बोलले जात आहे. असे झाले तर भाजपमध्ये मोठा बदल होण्याची खात्री आहे.

संघही झाला पुन्हा सक्रीय –
नितीन गडकरी आणि शिवराज सिंह चौहान यांचे आरएसएसशी चांगले संबंध असल्याचे सांगितले जाते. लोकसभा निवडणुकीत दुर्लक्ष झाल्यानंतर संघही सक्रिय झाल्याचे बोलले जात आहे. नवीन सरकार स्थापनेसोबतच ते भाजप संघटनेतही मोठ्या बदलांना हिरवा कंदील देऊ शकतात. यामध्ये आपल्या पसंतीच्या नेत्याला पक्षाध्यक्षपदावर बढती देण्याबरोबरच ते उत्तर प्रदेश आणि महाराष्ट्रात पक्ष मजबूत करण्यासाठी मोठी पावले उचलू शकतात.