नांदेड : आगामी स्थानिक स्वराज्य संस्थांच्या निवडणुकांपूर्वी राजकीय वातावरण तापले असताना नांदेड जिल्ह्यात राष्ट्रवादी काँग्रेस शरद पवार गटाला मोठा धक्का बसला आहे. जिल्ह्यातील प्रभावशाली गोरठेकर कुटुंबातील नेते शिरीष गोरठेकर आणि कैलाश गोरठेकर यांनी आपल्या शेकडो समर्थकांसह पक्ष सोडण्याचा निर्णय घेतला असून, ते शनिवारी (२५ ऑक्टोबर) राष्ट्रवादी काँग्रेस अजित पवार गटात प्रवेश करणार आहेत.

या पक्षप्रवेशामुळे उमरी तालुक्यात अजित गटाची ताकद वाढली असून, उपमुख्यमंत्री अजित पवार स्वतः या सोहळ्यात सहभागी होणार आहेत. या घडामोडीमुळे शरद पवार गटाची चिंता वाढली आहे.

याबाबाबत मिळालेल्या माहितीनुसार, शनिवारी उमरी आणि देगलूर तालुक्यांतील पदाधिकारी आणि कार्यकर्त्यांचा पक्षप्रवेश सोहळा आयोजित करण्यात आला आहे. या कार्यक्रमात उपमुख्यमंत्री अजित पवार यांच्यासह राष्ट्रवादी अजित पवार गटातील प्रमुख नेते उपस्थित राहणार आहेत. यामध्ये आमदार सुनील तटकरे, आमदार प्रताप पाटील चिखलीकर आणि माजी मंत्री नवाब मलिक यांचा समावेश आहे.

गोरठेकर कुटुंबाची राजकीय पार्श्वभूमी

नांदेड जिल्ह्यात गोरठेकर कुटुंबाचे मोठे नाव आहे आणि त्यांची तिसरी पिढी राजकारणात सक्रिय आहे. शिरीष गोरठेकर हे उमरी कृषी उत्पन्न बाजार समितीचे सभापती आहेत, तर कैलाश गोरठेकर हे नांदेड जिल्हा मध्यवर्ती सहकारी बँकेचे संचालक आहेत. हे दोघेही शरद पवार गटात गेल्या अनेक वर्षांपासून सक्रिय होते आणि स्थानिक पातळीवर मजबूत पाया निर्माण केला होता. कुटुंबाच्या या निर्णयामुळे उमरी तालुक्यातील स्थानिक राजकारणात उलथापालथ होण्याची शक्यता आहे.

अजित पवार गटाची इनकमिंग वाढली

स्थानिक स्वराज्य संस्थांच्या निवडणुकांना अवघे काही महिने शिल्लक असताना नांदेडमध्ये अजित पवार गटाची इनकमिंग वाढली आहे. शरद पवार गटातून नेत्यांची गळती होत असल्याने पक्षाची चिंता वाढली आहे. गेल्या काही महिन्यांत राष्ट्रवादीतील फुटीनंतर अजित गटाने जिल्हा पातळीवर मजबूत स्थिती निर्माण केली असून, या पक्षप्रवेशामुळे त्यांची पकड आणखी घट्ट होईल. राजकीय अभ्यासकांच्या मते, हा निर्णय स्थानिक पातळीवरील मतदारसंघांमध्ये अजित पवार गटाला फायदेशीर ठरेल.