कराड – तिहेरी अपघातात एकाच कुटुंबातील चौघांचा दुर्दैवी मृत्यू झाला आहे. समोरील कारने अचानक ब्रेक लावल्याने कार थांबवण्याचा प्रयत्न करत असताना पाठीमागून आलेल्या डंपरने जोरदार धडक दिल्याने इस्लामपूरजवळ हा अपघात घडला.

अधिकराव जगन्नाथ पोळ (वय49) , गिताबाई जगन्नाथ पोळ (70) सुषमा अधिकराव पोळ (वय 42), सरीता सुभाष पोळ (वय 35, सर्व रा. पोळवस्ती, आगाशिवनगर, मलकापूर, ता. कराड) अशी अपघातात मृत्यू पावलेल्या चौघांची नावे आहेत. तर समृद्धी सुभाष पोळ (वय 7) ही गंभीर जखमी झाली आहे. या दुर्दैवी घटनेने परिसरावर शोककळा पसरली आहे.

मिळालेल्या माहितीनुसार, आगाशिवनगर येथील पोळ कुटुंबीय नातेवाईकाच्या वास्तुशांती समारंभासाठी सकाळी कारमधून सांगलीकडे निघाले होते. पाच जण कार मधून निघाले होते. ते पेठ नाका ते इस्लामपूर मार्गे सांगलीकडे जात असताना इस्लामपूर जवळ समोरील कार चालकाने अचानक ब्रेक मारला.

यावेळी पोळ यांनीही त्वरित ब्रेक मारून आपली कार थांबवण्याचा प्रयत्न केला. त्याचवेळी पाठीमागून आलेल्या डंपरने त्यांच्या कारला जोरदार धडक दिली. या तिहेरी अपघातात चौघे ठार झाले. तर एक चिमुकली गंभीर जखमी झाली. जखमींवर कराड येथील रुग्णालयात उपचार सुरू आहेत.